Elmar Məmmədyarov Minsk qrupunun həmsədrlərini tənqid etdi

Azərbaycan tərəfi Minsk qrupunun həmsədrlərinin işindən narazıdır. Neçə ildir ki, onlar öz fəaliyyətləri ilə bağlı heç bir irəliləyişə nail olmayıblar.

1news.az-ın məlumatına görə, bunu Azərbaycanın xarici işlər naziri Elmar Məmmədyarov yunanıstanlı həmkarı Nikos Kotziasla görüşündən sonra keçirdiyi mətbuat konfransı zamanı deyib:

“Məlum olduğu kimi, BMT-nin Təhlükəsizlik Şurasının Dağlıq Qarabağ münaqişəsi ilə bağlı 4 qətnaməsi var. Minsk qrupu ölkələri tələb etməlidirlər ki, Ermənistan tərəfi bu qətnamələri yerinə yetirsin. Biz Azərbaycanın ərazi bütövlüyününü bərpasını tələb edirik. Həmsədrlər bu yöndə öz səylərini gücləndirməlidirlər”.

Nazir həmsədr ölkələrin XİN rəhbərlərinə etiraz məktubu ünvanladıqlarını da diqqətə çatdırıb:

“Həmsədrlərin Strasburqa ünvanladığı məktub çox gülüncdür. Mən hər üç ölkənin XİN-nə etiraz məktubu göndərdim. Bildirdim ki, Dağlıq Qarabağla bağlı hansı məsələni qaldırmaq istəyiriksə, bu bizim öz işimizdir. Buna müdaxilə edə bilməzlər. Onlar Avropa deputatlarına təzyiq göstərə bilməzlər. Bu məntiqsizlikdir”.

Nazir həmsədrlərlə görüş barədə heç bir yeni məlumatın olmadığını deyib:

“Bu şəkildə belə hərəkət edib Strasburqa məktub göndəriblərsə, düşünmürəm ki, görüş olsun”.

1news.az