“Lokomotiv” - “Fənərbaxça” oyununu 2 min polis qoruyacaq

Bu gün UEFA Avropa Liqasında 1/16 final mərhələsinin cavab qarşılaşmaları çərçivəsində növbəti oyunlar keçiriləcək.

1news.az-ın məlumatına görə, ən maraqla gözlənilən qarşılaşmalardan biri Moskvada baş tutacaq. Yerli “Lokomotiv” klubu ilk görüşdə 0:2 hesabı ilə uduzduğu “Fənərbaxça”nı qonaq edəcək.

Bakı vaxtı ilə saat 20:00-da start veriləcək qarşılaşma prinsipiallığı ilə diqqət mərkəzindədir. Türkiyə və Rusiya arasındakı siyasi gərginliyin fonunda ötən oyun rusların yarımmüdafiəçisi Dmitri Tarasovun “mayka” skandalı ilə daha artan həyəcan oyuna marağı daha da artırır.

Bunu nəzərə alan Moskva polisi prinsipial oyunda təhlükəsizliyi təmin etmək üçün tədbirlər görür. Belə ki, “İnterfaks”ın məlumatına görə, oyun zamanı asayişin və vətəndaşların təhlükəsizliyinin qorunması üçün iki minə yaxın polis əməkdaşı, daxili qoşunların hərbçiləri və mühafizə təşkilatlarının əməkdaşları cəlb ediləcək.

Bundan başqa matça idman tədbirlərində qaydalara riayətin təmin edilməsində təcrübəyə malik dörd türk polisindən ibarət heyət gələcək.

1news.az