Azərbaycan ilə Bolqarıstan arasında ticarət dövriyyəsi 2,2 dəfə artıb
Bu ilin 8 ayında Azərbaycan ilə Bolqarıstan arasında ticarət dövriyyəsi 2,2 dəfə artıb.
1news.az AZƏRTAC-a istinadən xəbər verir ki, bu barədə iqtisadiyyat nazirinin müavini Sahil Babayev sentyabrın 29-da Bakıda keçirilən Azərbaycan-Bolqarıstan biznes forumunda deyib.
“Azərbaycan ilə Bolqarıstan arasındakı iqtisadi əlaqələr dinamik inkişaf edir. İndiyədək ölkələrimiz arasında 20-si iqtisadi olmaqla 70-ə yaxın sənəd imzalanıb. Azərbaycanda əlverişli biznes mühiti yaradılıb. Bolqarıstan şirkətlərini Azərbaycana investisiya yatırmağa, müştərək müəssisələrin və birgə istehsalın qurulmasında iştirak etməyə dəvət edirəm”, - deyə nazir müavini qeyd edib.
Biznes forumda Azərbaycanda İxracın və İnvestisiyaların Təşviqi Fondu (AZPROMO) ilə Bolqarıstanın Kiçik və Orta Sahibkarlığın Təşviqi Agentliyi (BSMERA), Azərbaycan Ticarət-Sənaye Palatası ilə Sofiya şəhərinin Ticarət-Sənaye Palatası, Azərbaycan Ticarət və Sənaye Palatası ilə BSMERA arasında, AZPROMO ilə Bolqarıstan-Azərbaycan Ticarət-Sənaye Palatası arasında əməkdaşlığa dair memorandumlar imzalanıb.
1news.az
