Elmar Məmmədyarov İranın yeni səfirini qəbul edib
Xarici işlər naziri Elmar Məmmədyarov İran İslam Respublikasının Azərbaycana yeni təyin olunmuş səfiri Cavad Cahangirzadəni qəbul edib.
1news.az-ın məlumatına görə, səfir C.Cahangirzadə etimadnaməsinin surətini nazir E.Məmmədyarova təqdim edib.
Cavad Cahangirzadəni ölkəmizə səfir təyin olunması münasibəti ilə təbrik edən E.Məmmədyarov ona gələcək fəaliyyətində uğurlar arzulayıb.
Görüşdə son illər ərzində Azərbaycan və İran dövlət başçılarının çoxsaylı görüşlərinin və şəxsi dostluq münasibətlərinin ölkələrimiz arasında hərtətəfli əməkdaşlığın inkişafına mühüm töhfə verdiyi qeyd olunub. Azərbaycan və İran arasında əlaqələrin dostluq, qarşılıqlı hörmət və mehriban qonşuluq prinsipləri əsasında uğurla inkişaf etməsindən məmnunluq ifadə edilib.
Azərbaycan-İran-Rusiya dövlət başçılarının bu ilin avqustunda Bakıda keçirilmiş üçtərəfli görüşünün əhəmiyyəti vurğulanıb və Şimal-Cənub nəqliyyat dəhlizinin strateji xarakter daşıdığı qeyd olunaraq, regionlararası əməkdaşlığın inkişafına mühüm töhfə verəcəyinə əminlik ifadə edilib.
Görüşdə həmçinin iki ölkə arasında nəqliyyat, neft-qaz, energetika, kənd təsərrüfatı, turizm və digər sahələrdə ikitərəfli əməkdaşlığın genişləndirilməsi üçün birgə səylərin artırılmasının vacibliyi qeyd olunub.
1news.az
