ATƏT-in Minsk qrupunun həmsədrləri bəyanat yayıblar
ATƏT-in Mİnsk qrupunun həmsədrləri Rusiya, ABŞ və Fransanı təmsil edən İqor Popov, Ceyms Uorlik və Pyer Andre hazırki sədrinin şəxsi nümayəndəsi Anje Kasperşiklə birgə 23-25 oktyabr tarixlərində bölgəyə səfər ediblər.
1news.az-ın qurumun saytına istinadən verdiyi məlumatına istinadən, bu haqda ATƏT-in Minsk qrupunun bəyanatında deyilir.
Bəyanata əsasən, səfər çərçivəsində həmsədrlər Azərbaycan və Ermənistanın prezidentləri və xarici işlər nazirləri, Ermənistanın yeni təyin olunmuş müdafiə naziri və işğal olunmuş Dağlıq Qarabağda separatçı rejimin “nümayəndələri” ilə görüşüblər.
“Həmsədrlərin səfəri bu ilin aprel ayında yaşanan döyüşlərdən sonrakı vəziyyəti müzakirə etmək və danışıq prosesi çərçivəsində mövqeləri aydınlaşdırmaq.
Görüşlərdə tərəflər vəziyyətin nisbətən sakit olduğunu təsdiq ediblər.
Həmsədrlər atəşkəsin davam etdirilməsinin danışıqlar üçün zəruri olduğunu, həmçinin Vyanada və Sankt-Peterburqda əldə olunan qərarların tam yerinə yetirilməsinin vacib olduğunu vurğulayıblar.
Onlar həmçinin davamlı sülhə yönələn substantiv danışıqlarla bağlı cari təklifləri müzakirə ediblər. Hər iki ölkənin prezidenti münaqişənin həlli prosesinin necə irəlilədilməsinə dair öz fikirlərini bildiriblər. Onlar həmçinin ATƏT-in şəxsi nümayəndəsinin ofisinin genişləndirilməsini istədiklərini bir daha vurğulayıblar və hal-hazırda bunun əməliyyat məsələləri müzakirə olunur”, - bəyanatda deyilir.
Bəyanata əsasən, bölgəyə səfər çərçivəsində həmsədrlər həmçinin Beynəlxalq Qırmızı Xaç Komitəsi (BQXK) ilə də görüşüblər.
Görüşdə həmsədrlərin dəstəklədiyi itkin düşmüş şəxslərlə bağlı məlumatların mübadiləsi müzakirə olunub.
1news.az
