28 May - Respublika Günü münasibətilə elan edilmiş amnistiya aktının icrası başa çatıb
Azərbaycan Respublikası Milli Məclisinin deputatı, Heydər Əliyev Fondunun prezidenti Mehriban Əliyevanın mərhəmətlik və insanpərvərlik ənənələrindən irəli gələn təşəbbüsü əsasında Azərbaycan Respublikasının Milli Məclisi tərəfindən qəbul edilmiş “28 May - Respublika Günü münasibətilə amnistiya elan edilməsi haqqında” 2016-cı il 20 may tarixli Qərarın icrası başa çatıb.
Amnistiya aktının icrasının yekunlarına dair aparılmış ümumiləşdirmələr nəticəsində həmin aktın 10931 məhkuma şamil olunduğu müəyyən edilib. Onlardan 611-i qadın, 105-i isə yetkinlik yaşına çatmayan şəxslərdir.
Amnistiya qərarı azadlıqdan məhrumetmə yerlərində cəza çəkən 3573 məhkuma tətbiq edilib. Onlardan 2901 məhkum azadlıqdan məhrumetmə cəzasından azad olunub, 634 məhkumun cəzasının çəkilməmiş müddəti 6 ay azaldılıb, habelə 38 hərbçi intizam xarakterli hərbi hissələrdən azadlığa buraxılıb.
Həmçinin 2 min manatadək məbləğdə cərimə cəzasına məhkum edilmiş və maddi vəziyyətinin çətinliyi ilə əlaqədar onu ödəyə bilməyən 2563 şəxs təxminən 2,7 milyon manat məbləğində cərimədən azad edilib. Bununla yanaşı, 2 min manatdan artıq məbləğdə cərimə cəzasına məhkum edilmiş və cərimənin 2 min manatdan yuxarı olan hissəsini ödəmiş şəxslərə də amnistiya tətbiq edilib. Nəticədə dövlət büdcəsinə 472 min manatdan artıq məbləğdə vəsaitin ödənilməsi təmin olunub.
Bundan əlavə, islah işləri cəzasına məhkum edilmiş 4453 və ictimai işlər cəzalarına məhkum edilmiş 80 şəxs bu cəzalardan azad olunub. Şərti məhkum edilmiş, cəzasının çəkilməsi təxirə salınmış və cəzadan şərti olaraq vaxtından əvvəl azad edilmiş 231 məhkum barəsində də amnistiya tətbiq edilib.
Ümumilikdə ulu öndər Heydər Əliyevin həyata keçirdiyi humanizm siyasəti nəticəsində 1995-ci ildə əfv və amnistiya təsisatları bərpa edildikdən sonra qəbul edilən 11 amnistiya aktı 117 mindən çox şəxsə tətbiq edilib, təxminən 30 min məhkum cəzaçəkmə müəssisələrindən azad olunub.
Mövzu ilə əlaqədar oxuyun:
Milli Məclisin Respublika Günü münasibətilə amnistiya elan edilməsi haqqında QƏRARI
Mehriban Əliyeva amnistiya aktının qəbul olunması ilə bağlı Milli Məclisə müraciət edib
Mehriban Əliyeva: “Bir dəfə səhv edən şəxslərin bağışlanmağa haqqı var”
Bu gün 200-ə yaxın məhbus azadlığa buraxılıb
AZƏRTAC
