Mübariz Qurbanlı Türkiyənin ölkəmizdəki yeni səfiri ilə görüşüb

Komitədən 1news.az-a verilən məlumata görə, noyabrın 2-də Dini Qurumlarla İş üzrə Dövlət Komitəsində Mübariz Qurbanlı Türkiyə Respublikasının ölkəmizdə yeni təyin olunmuş fövqəladə və səlahiyyətli səfiri Erkan Özoralla görüşüb.

Səfiri təyinatı münasibətilə təbrik edən Dövlət Komitəsinin sədri Azərbaycan-Türkiyə dövlətləri arasında mövcud olan səmimi, qardaş münasibətdən danışıb. O bildirib ki, Türkiyə-Azərbaycan xalqları və dövlətləri arasında tarix boyu formalaşmış qardaşlıq münasibətlərinin daha da möhkəmləndirilməsi, bütövlükdə türk-İslam dünyasının mədəni-mənəvi vəhdətinin qorunub saxlanılması və daha da inkişaf etdirilməsi yolunda iki ölkə hər zaman səy göstərib və göstərməkdə də davam edəcək. Mübariz Qurbanlı  bütün sahələrdə olduğu kimi din sahəsində də ölkələrimiz arasında əlaqələrin yüksələn xətlə inkişaf etdiyini deyib.

Səfir də öz növbəsində Dövlət Komitəsinin sədrinə təbrikindən dolayı təşəkkür edib. O, Azərbaycanla Türkiyə arasında qardaşlıq münasibətlərindən, bu əlaqələrin sağlam və davamlı inkişafından danışıb.

Görüşdə Dövlət Komitəsi sədrinin birinci müavini Səyyad Salahlı və müavini Səyavuş Heydərov da iştirak ediblər. 

1news.az