Bakıda “Şimal-Cənub” nəqliyyat dəhlizinin inkişaf perspektivləri müzakirə olunub

Bakıda “Şimal-Cənub” Beynəlxalq Nəqliyyat Dəhlizinin qərb marşrutu üzrə yük daşımalarının təşkili və tranzit potensialının inkişafına dair İşçi Qrupun iclası keçirilib.

“Azərbaycan Dəmir Yolları” QSC-nin ictimaiyyətlə əlaqələr şöbəsindən 1news.az-a bildirilib ki, tədbirdə Azərbaycan, Rusiya, Belarus və İran dəmir yollarının nümayəndə heyətləri iştirak ediblər.

İşçi Qrupun iclasında qarşılıqlı yük axınlarının bərabərləşdirilməsi üçün Azərbaycan üzərindən İran-Rusiya istiqamətindəki perspektiv yük axınları haqqında İran tərəfinin məlumat və statistikası; Körfəz və Hindistandan İran, Azərbaycan, Rusiya və Belarus ərazilərini keçməklə Avropa ölkələrinə (və əks istiqamətdə) yük daşımaları üçün yük bazasının müəyyənləşdirilməsi məqsədilə Hindistandan ekspeditorlar, operatorlar, yük göndərənlər/alanlar ilə 2018-ci ilin yanvar ayında görüşün təşkili məsələsinin nəzərdən keçirilməsi; “Şimal-Cənub” Beynəlxalq Nəqliyyat Dəhlizi üzrə Azərbaycan, Rusiya, Belarus və İranın logistik şirkətləri arasında qarşılıqlı əlaqələr haqqında Azərbaycan tərəfinin məlumatı; Konteyner (blok) qatarlarının Astara (İran) – Moskva və əks istiqamətdə mütəmadi şəkildə işə salınması üçün hərəkət cədvəlinin müzakirəsi və təsdiqlənməsi məsələləri müzakirə edilib.

Həmçinin İran ərazisi ilə yüklü və boş vaqon, eyni zamanda, konteynerlərin keçidinə dair İran tərəfinin hesabatı; İran tərəfindən refrijerator konteynerlərinin daşınması üçün texnologiya və tariflərin müzakirəsi və Astara (İran) – Astara (Azərbaycan) yeni dəmir yolu xəttinin açılmasına dair Azərbaycan tərəfinin məlumatı müzakirə edilən məsələlər sırasında olub.

Tədbirin sonunda müvafiq sənədlər imzalanıb.

1news.az