Azərbaycanda millət vəkillərinin əmək haqlarının artırılması şayiə xarakteri daşıyır
Bir neçə gündür ki, sosial şəbəkələrdə və bəzi mətbuat orqanlarında millət vəkillərinin maaşlarının artırılması haqqında məlumatlar yayılıb. Həmin məlumatlarda millət vəkillərinin maaşlarının gələn ilin yanvar ayından 800 manat artırıldığı qeyd edilib.
1news.az-ın araşdırması zamanı isə bəlli olub ki, reallıqda millət vəkillərinin maaşlarının artırılması ilə bağlı heç bir qərar qəbul edilməyib və yazılanlar şayiə xarakteri daşıyır. . Belə şayiələri yayanlar əsasən Azərbaycan Prezidenti İlham Əliyevin 2017-ci ilin 25 dekabr tarixində imzalamış fərmanına istinad edir. Halbuki həmin fərmanda Milli Məclisin Aparatının saxlanma xərcləri haqqında bənd var. Sözügedən bənddə Aparatın saxlanma xərcləri, əvvəlki illə müqayisədə 1.5 mln. manat artırılaraq, 25.4 mln. manat nəzərdə tutulub. Araşdırmamız zamanı bəlli olub ki, millət vəkillərinin, həmçinin həmin Aparatda çalışan dövlət qulluqçularının əmək haqlarına bunun heç bir aidiyyəti yoxdur. Belə ki, millət vəkillərinin əmək haqlarının artırılması üçün “Azərbaycan Respublikası Milli Məclisi deputatının statusu haqqında” Azərbaycan Respublikasının Qanununda dəyişiklik edilməlidir. Bu isə baş verməyib. Millət vəkillərinin əmək haqları həmin Qanunun 21-ci maddəsinə əsasən müəyyən edilir.
Millət vəkili Vahid Əhmədov ölkə.az saytına açıqlamasında qeyd edilən məsələyə aydınlıq gətirib. Onun sözlərinə görə, belə bir məlumat yoxdur. Yəni deputatların maaşlarında hər hansı artım baş verməyib:
“Belə bir məlumat yoxdur. Elə bir artım olmayıb. Əgər bu barədə qərar olsaydı, mütləq xəbərimiz olardı”.
Göründüyü kimi, Azərbaycanda millət vəkillərinin əmək haqlarının artırılması haqqında məlumatlar şayiə xarakteri daşıyır. Bu şayiəni gündəmə gətirib onu xəbərə çevirib KİV-də və sosial şəbəkələrdə yayanlar görəsən hansı məqsədi güdür?!
1news.az
