Rusiya Qahirə ilə müntəzəm aviasiya əlaqəsini bərpa edib
Rusiya Prezidenti Vladimir Putin Qahirə ilə müntəzəm aviasiya əlaqəsinin bərpa olunması barədə fərman imzalayıb. Sənəd hüquqi informasiya rəsmi portalında dərc edilib.
1news.az xarici KİV-ə istinadla xəbər verir ki, fərman imzalandığı vaxtdan - dekabrın 30-dan etibarən qüvvəyə minib.
Bir qədər əvvəl, 2017-ci il dekabrın 15-də Moskvada Rusiyanın nəqliyyat naziri Maksim Sokolov və Misirin aviasiya naziri Şərif Fəthi 2015-ci ilin payızında kəsilmiş aviasiya əlaqəsinin bərpasına dair sənəd imzalamışdılar. Sənəddə söhbət hələlik Moskva və Qahirə arasında müntəzəm aviareyslərin bərpasından gedirdi.
Şərif Fəthinin sözlərinə görə, hər hansı neqativ hadisə baş verməsə, Moskva və Qahirə arasında uçuşlar 2018-ci il fevralın 1-dən başlayacaq, çarter reyslərinin bərpası isə aprel ayında müzakirə olunacaq.
Misirin turistik palatalar ittifaqının məlumatına əsasən, ölkələr arasında birbaşa aviareyslər olmasa da, 2017-ci ilin sentyabr ayında Misirə 70 min rusiyalı turist gəlib.
Xatırladaq ki, Rusiya Misirlə aviasiya əlaqəsini 2015-ci ilin noyabrında Şarm-əş-Şeyxdən Peterburqa uçan təyyarənin Sinay üzərində qəzaya uğramasından sonra dayandırmışdı. Qəza nəticəsində “Koqalımavia” kompaniyasına məxsus laynerin göyərtəsindəki 217 rusiyalı turistin və 7 ekipaj üzvünün hamısı həlak olmuşdu. FTB sonradan bu hadisəni terror aktı kimi qiymətləndirmişdi. Təhqiqat indiyə qədər davam edir.
1news.az
