“DəmirBank”ın kreditorlarının tələblərinin qeydə alınmasına başlanılır

Ləğv prosesində olan “DəmirBank” ASC-nin kreditorlarının tələblərinin qeydə alınmasına başlanılır.

Azərbaycan Respublikası Bakı Apellyasiya Məhkəməsi tərəfindən “DəmirBank” ASC-nin müflis elan edilməsi və barəsində iflas proseduruna başlanılması haqqında 2017-ci il 27 dekabr tarixli qərar qəbul edilib. Eyni qərarla “DəmirBank” ASC-yə Əmanətlərin Sığortalanması Fondu 2017-ci il 27 dekabr tarixindən ləğvedici təyin edilib.

Əmanətlərin Sığortalanması Fondundan 1news.az-a bildirilib ki, Azərbaycan Respublikası “Banklar haqqında” Qanunun tələbləri nəzərə alınmaqla, müflis banka qarşı tələblər bankın müflis elan olunmasına dair məhkəmə qərarının kütləvi informasiya vasitələrində ilk dəfə dərc edildiyi gündən 60 təqvim günü ərzində ləğvedici tərəfindən yazılı şəkildə qeydə alınmalıdır. Tələblərin qeydə alınması üçün kreditorlar öz tələblərinin hüquqi əsasını sübut edən sənədləri və aşağıdakı məlumatları təqdim etməlidirlər: kreditorun adı və ünvanı; tələbin əsas məbləğinə daxil edilən faizlərin və digər haqların məbləğləri; tələbin təminatı olan girov (ipoteka) və ya qarantiya barəsində məlumat.

Kreditorlardan xahiş olunur ki, bu elanın dərc edildiyi gündən 60 (altmış) gün ərzində “DəmirBank” ASC-nin ləğvedicisi Əmanətlərin Sığortalanması Fondunun aşağıdakı ünvanlarına müraciət etsinlər:

Bakı şəhəri, Bülbül prospekti, 40, 4-cü mərtəbə, AZ1014.

Bakı şəhəri, Babək prospekti, 16, AZ1025.

Əlavə məlumatlar üçün əlaqə nömrələri (+99412) 447-77-44; 596-65-91.

Qaynar xətt – 941.

Əmanətlərin Sığortalanması Fondundan, həmçinin bildirilib ki, əvvəlki elanda qorunan əmanətçilərə sığorta hadisəsinin baş verməsi ilə əlaqədar kompensasiyaların “Kapitalbank” ASC vasitəsi ilə ödənilməsi barədə məlumat verilib. Həmin ödənişlərin vaxtı və yeri (müvafiq filiallar) barədə yaxın zamanda əlavə məlumat veriləcək.

1news.az