İmişlidə bayram günü 5 nəfəri vuran sürücü həbs edilib

İmişlidə bayram günü 5 nəfəri vuran sürücü həbs edilib

Baş prokurorluqdan 1news.az-a verilən məlumata görə, dekabrın 31-də saat 20 radələrində İmişli şəhər sakini, 1989-cu il təvəllüdlü Seymur Mehtiyev idarə etdiyi “VAZ-2107” markalı 30-BD-026 dövlət qeydiyyat nişanlı avtomobillə şəhər ərazisində hərəkətdə olarkən yolu keçmək istəyən piyadalar - Səbuhi Mustafazadəni, Sabir Cavadlını, Ruslan Cavadovu, Şəhriyar Həsənlini və Həsrət Nəsirovu vurub. Nəticədə H.Nəsirov aldığı xəsarətlərdən hadisə yerində ölüb.

Faktla bağlı İmişli Rayon Polis Şöbəsinin İstintaq Bölməsində Cinayət Məcəlləsinin 263.2-ci (yol hərəkəti və nəqliyyat vasitələrinin istismarı qaydalarını pozma ehtiyatsızlıqdan zərərçəkmiş şəxsin ölümünə səbəb olduqda) maddəsi ilə cinayət işi başlanıb.

S.Mehtiyev iş üzrə təqsirləndirilən şəxs qismində cəlb olunub. Ona Cinayət Məcəlləsinin qeyd edilən maddəsi ilə ittiham elan olunub və məhkəmənin qərarı ilə barəsində həbs qətimkan tədbiri seçilib.

Hazırda iş üzrə istintaq tədbirləri davam etdirilir.

1news.az