Hande Harmancı sosial şəbəkədəki paylaşıma görə üzr istədi - FOTO

Ümumdünya Səhiyyə Təşkilatının (ÜST)  Azərbaycandakı nümayəndəsi Dr Hande Harmancının Sosial mediada paylaşdığı və mənfi reaksiyaya səbəb olan şəkillərlə bağlı məsələyə aydınlıq gətirib.

 1news.az xəbər verir ki, Hande Harmancı deyib:

Bildiyiniz kimi, COVID-19 pandemiyası ilə əlaqədar REACT-C19 layihəsini həyata keçiririk. Layihə çərçivəsində Türkiyədə təhsil almış və çalışan 19 azərbaycanlı həkim hazırda ölkənin müxtəlif rayon və şəhərlərinə səfər edərək, yerli həkimlərə kömək edirlər.

İyunun 13-də, həmin həkimlərlə birlikdə Quba və Qusar rayonlarına səfər etmişdik. Sosial mediada paylaşdığım şəkillər və video o zaman çəkilib.  

Bu paylaşımı yanlış zamanda etdiyimi qəbul edirəm və buna görə sizdən üzr istəyirəm.

Görəcəyimiz işlər hələ çoxdur. Sizin dəstəyinizə çox ehtiyacımız var. Pandemiyanın öhdəsindən yalnız birlikdə gələ bilərik".

Xatırladaq ki, Ümumdünya Səhiyyə Təşkilatının (ÜST)  Azərbaycandakı nümayəndəsi Dr.Hande Harmancı sərt karantin günlərində Quba və Qusar meşələrində istirahət zamanı çəkdirdiyi fotoları "Instagram"da paylaşıb.Bu paylaşım kəskin tənqid olunub. Sosial şəbəkə istifadəçiləri  "Bizə evdə qalmaq məsləhəti verib, özü isə rayona gedib" yazaraq, Hande Harmancının fotosunu tənqid ediblər. Həmin fotoları təqdim edirik:

Qafar Ağayev