“Al Market”də biabırçılıq: “Badamlı” aldı, xəstəxanalıq oldu - FOTO

Müştəri Bakıda fəaliyyət göstərən "Al Market"dən üzərində "Badamlı" etiketi olan qazsız su alsa da, içəndə onun spirt olduğunun fərqinə varıb.

1news.az xəbər verir ki, bu iddia ilə Nərmin Adil adlı feysbuk istifadəçisi sosial şəbəkədə paylaşım edib. O bildirib ki, ötən gün axşam saatlarında "Al Market"in Əhmədli filialında vitrindən "Badamlı" markalı sadə qazsız su götürüb:

"Telefonla danışa-danışa gəlib həyətimizdə açdım və başıma çəkdim. Bir saniyə sonra anladım ki, bu, su deyil, spirt kimi bir dadı var, ağzımı, boğazımı, mədəmi yandırdı. Qonşular su verdilər. Getdim marketə, dedilər ki, yanlış düşüb, firma dezinfeksiya məhlulu göndərib, onu da satıcılar yanlışlıqla su bilib vitrinə düzüblər. Durumu elə də ciddiyə almadılar. Evə gələndən 1 saat sonra artıq gözlərim iki görürdü, nəfəs darlığı başladı. Təcili tibbi yardım və polis çağırdıq. "Semaşko"nun Toksikologiya şöbəsinə gətirildim. Dünəndən vəziyyətim ağırdır, ekspertiza və qan analizi nəticəsində qanımda metil spirti aşkarlandı. Buna baxmayaraq, "Al Market" şəbəkəsi tərəfindən mənə nə bir zəng edilib, nə də üzrhaqlığını bildirilib. Hazırda gözlərimdə və sinir sistemimdə bu kimyəvi məhsula görə problem yaranıb".

Məsələ ilə bağlı "Al Market"dən heç bir açıqlama verilməyib.

1news.az