Jurnalistlər “Şahdağ”da qış turizminə hazırlıqla tanış oldular - FOTO

Dövlət Turizm Agentliyinin təşkilatçılığı ilə 18-19 dekabr tarixlərində Azərbaycanda qış turizmi mövsümünün açılışı və turizm imkanlarının tanıdılması məqsədilə “Şahdağ” Turizm Mərkəzində jurnalistlər üçün nəzərdə tutulan 2 günlük mediatur sona çatıb.

1news.az xəbər verir ki, mediaturun məqsədi Azərbaycanda qış turizmi növlərinin və məhsullarının təşviqi, insanların turizmin bu sahəsinə marağının artırılması, həmçinin “Şahdağ” Turizm Mərkəzinin fəaliyyəti, qış mövsümü ərzində turistlərə göstəriləcək xidmətlər haqqında ictimaiyyəti məlumatlandırmaqdır.

KİV nümayəndələri mediatur zamanı 4 ulduzlu “Shahdag Hotel & Spa”, 3 ulduzlu “Zirve” hotelləri və “Gaya” ailəvi apartament tipli mehmanxana ilə tanış olublar.

Jurnalistlərə turizm mərkəzində qonaqlara təklif olunan müxtəlif əyləncələr nümayiş etdirilib.

Bundan əlavə, KİV nümayəndələri müxtəlif atraksionlar, xizək vasitələri, kanat yolları və qış əyləncələrindən istifadə ediblər.

Təqdimatda çıxış edən nümayəndələr Azərbaycanda fəaliyyət göstərən qış turizm mərkəzləri üzrə statistik göstəricilər, xizəkçilik imkanları, qış turizm kompleklərində mövcud qış əyləncələri və digər turizm məhsulları haqqında məlumat verərək, 2023-cü il üçün görüləcək işlər və planlar barədə məlumatlar veriblər.

Büro təmsilçisi Günel Bədəlova Azərbaycanda qış turizmi növlərinin və məhsullarının təşviqi, həmçinin “Şahdağ” Turizm Mərkəzinin, “Tufandağ” Qış-Yay Turizm İstirahət Kompleksi, Naxçıvandakı Ağbulaq Xizək Mərkəzinin fəaliyyəti, qış mövsümü ərzində turistlərə göstəriləcək xidmətlər barədə danışıb. Bildirib ki, bütün komplekslərdə kvadrosikllər, kanatlar, xizək yolları, xizək sürməyi öyrənmək üçün təlim kursları fəaliyyət göstərir.

Dövlət Turizm Agentliyi sədrinin müşaviri Kənan Quluzadə bildirib ki, bu ilin yanvar-noyabr aylarında Azərbaycana 1,4 milyon xarici vətəndaş gəlib. Pandemiyanı nəzərə alsaq bu, müsbət rəqəmdir. Bu, əvvəlki illə müqayisədə 2 dəfə çox olsa da, 2019-cu illə müqayisədə 2 dəfə azdır.