Emin Əmrullayev 8 Martla bağlı valideynlərə müraciət etdi: “Özünüzdə cəsarət tapın”

“Əgər məktəblərdə 8 Mart Beynəlxalq qadınlar günü münasibətilə pul yığılırsa, hədiyyə tələb olunursa, valideynlər tərəfindən şikayət olunmaldır ki, biz bunun qarşısını alaq”.

1news.az xəbər verir ki, bunu bu gün keçirdiyi brifinqdə jurnalistlərin suallarını cavablayan elm və təhsil naziri Emin Əmrullayev deyib.

Nazir bildirib ki, bu məsələdə 2 hal var. Biri hansısa məcburetmə və digər formada hədiyyələrin yığılmasıdır. Digər isə validenylərin özlərinin hədiyyə almaq istəyidir. Valideynlər tərəfindən məktəblərdə müəllimlərə çox bahalı hədiyyələr verilir. Bayramda müəllimlərə külli miqdarda pulların və bahalı hədiyyələrin verilməsi pedaqoji olaraq etik deyil.

“Bizim müşahidələrimizə görə 8 martda qadın müəllimlərə hədiyyə alınması, pul yığılması heç də müəllimlətin təşəbbüsü ilə olmur. Bu təşəbbüsü əsasən valideyn komitəsi, ayrı-ayrı valideynlər ortaya atır”.

Qadın müəllimləri təbrik etməkdə pis heçnə yoxdur. Biz özümüz də müəllimləri təbrik edirik. Amma müəllimləri bahalı hədiyyə və pul yığmaqla təbrik etmək, dediyim kimi, pedaqoji dəyərlərə ziddir. Məktəblər tərəfindən belə məcburetmə tədbirləri olsa, valideynlər Elm və Təhsil Nazirliyinin qaynar xəttinə zəng vuraraq bildirməlidirlər. Valideynlər özlərində cəsarət tapıb, bahalı hədiyyələri, pulları müəllimə rüşvət şəklində verməməlidirlər. Bundan utanmamalıdırlar. Özümüz dəyişməyə başlamalıq”.