Mərkəzi Bank 2022-ci ilin yekunlarına görə zərəri azaldıb
Azərbaycan Mərkəzi Bankı (AMB) 2022-ci ili 63,955 milyon manat dəyərində xalis zərərlə başa vurub.
1news.az bu barədə bazar ertəsi bankın maliyyə hesabatına istinadən xəbər verir.
Qeyd edək ki, 2021-ci ilin yekunlarına görə Mərkəzi Bankın zərəri 162,746 milyon manat təşkil edirdi. Beləliklə Mərkəzi Bankın zərəri 60,7 faiz azalıb.
Hesabatdakı məlumatlara görə, ötən il AMB-nin faiz gəlirləri 221,02 milyon manat (68,4 faiz çox), faiz xərcləri 167,928 milyon manat (0,9 faiz çox), digər əməliyyat gəlirləri isə 30,357 milyon manat (5,7 dəfə çox) olub.
Bundan başqa, haqq və komissiya gəlirləri 32,421 milyon manat (58,24 faiz), haqq və komissiya xərcləri 3,7 milyon manat, amortizasiya olunan dəyərlə qiymətləndirilən maliyyə öhdəliklərinin ədalətli (diskontlaşdırılmış) dəyərdə tanınması üzrə gəlir 59,042 milyon manat (7,9 dəfə çox), qiymətli kağızların yenidən qiymətləndirilməsi üzrə xalis zərər 92,846 milyon manat (5,7 dəfə çox), ədalətli dəyərinin dəyişməsi sair məcmu gəlirə aid olunan qiymətli kağızların realizasiyası üzrə xalis zərər 29,906 milyon manat (15,5 faiz az) olub.
Maliyyə hesabatına əsasən, qiymətli kağızların dəyərsizləşməsi üzrə zərər 776 min manat, törəmə maliyyə alətlərinin yenidən qiymətləndirilməsi üzrə xalis gəlir 23,863 milyon manat (2,6 faiz çox), investisiya fondlarındakı vəsaitlərin yenidən qiymətləndirilməsi üzrə xalis gəlir 4,587 milyon manat (34,5 dəfə çox) olub.
