Vüqar Bayramov: “Qeyri-neft sektoru və qeyri-neft sənayesində artım islahatlar bağldır”
“2023-cü ilin yarım ili göstərir ki, Azərbaycan iqtisadiyyatı artım tempini qoruyub saxlayıb”.
Bunu 1news.az-a açıqlamasında Milli Məclisin deputatı Vüqar Bayramov deyib.
O, bildirib ki, xüsusən də qeyri-neft sektorunda artımın yüksək olması artıq enerjidənkənar sektorların drayverə çevrilməsi anlamına gəlir.
“Qeyri-neft sənayesinin 6,5 faiz, qeyri-neft sektoru isə 3 faizdən çox artması ölkədə baş verən islahatların nəticəsi kimi qiymətləndirilməlidir. Çünki bu nəticə etibarı ilə qeyri-neft sektoru üçün yeni imkanlar yaradıb. Bu baxımdan 6 ayın yekunlarını müsbət qiymətləndirmək olar. Bu yekunlar xüsusən də 2018-ci ildən başlayaraq gizli iqtisadiyyata qarşı mübarizənin gücləndirilməsi, islahatların dərinləşməsinin nəticələri ilə xarakterizə olunur. Çünki bu, nəticədə maliyyə imkanlarımızı artırıb. Yalnız 2023-cü ilin ilk yarısında dövlət büdcəsinə ödənilən vəsaitin həcmindəki proqnoza nisbətən artımlar büdcəyə yenidən baxılmasına və dürüstləşmənin aparılmasına imkan yaratdı. 2023-cü ilin ilk 6 ayında dövlət büdcəsinə proqnozlaşdırılandan 2,4 milyard manat daha çox vəsaitin yığılması qeydə alındı. Bu da dövlət büdcəsinin dürüstləşdirilməsi üçün imkan yaratdı".
Nəqliyyat sektorunun inkişafından danışan deputat bildirib ki, Azərbaycan Orta dəhlizi dəstəkləyən regional ölkələrdəndir.
“Azərbaycan üzərindən daşınan yüklərin həcmində də həm 2022-ci ilin, həm də 2023-cü ilin birinci yarısında artımlar qeydə alınıb. Bu da həm beynəlxalq yükləri daşıyan nəqliyyat şirkətlərinin sayını artırır, həm də nəqliyyat sektorunun özünün əlavə dəyər yaratması ilə bağlıdır. Növbəti dövr üçün də beynəlxalq yükdaşımalar, nəqliyyat və logistikadan daha çox vəsaitin əldə edilməsi prioritet olaraq qalacaq. Bu da nəqliyyat sektorunun ümumi daxili məhsuldakı payının artmasına, ölkəyə daxil olan valyutanın həcminin artmasında gətirib çıxaracaq. Növbəti illərdə də Azərbayca üzərindən daşınan yüklərin həcmində də artım tempinin qorunub saxlanmasını müşahidə edəcəyik”.
