Aytən Seyidova: “Azərbaycan Dövləti dağ-mədən sənayesinin inkişafına hərtərəfli şəkildə dəstək göstərir”
“Azərbaycan dövləti qeyri-neft sektorunun ayrı-ayrı perspektivli sahələrinə, o cümlədən dağ-mədən sənayesinin inkişafına hərtərəfli şəkildə dəstək göstərir” .
1news.az xəbər verir ki, bunu ETSN-in şöbə müdiri Aytən Seyidova Bakıda keçirilən Ulu Öndər Heydər Əliyevin 100 illik yubileyinə həsr olunan Beynəlxalq Geologiya-Mədənçilik Forumunda jurnalistlərə açıqlamasında deyib.
“Regionlarımızda müxtəlif növ faydalı qazıntı ehtiyatlarının olması, eləcə də dağ-mədən sənayesində istehsal edilən məhsullara dünya bazarında tələbatın artması, bu sahədə potensialın yüksək olmasının göstəricisidir. Lakin bu nailiyyətlərlə yanaşı, ətraf mühitin qorunması üçün dağ-mədən müəssisələrinə iqtisadi-ekoloji cəhətdən yanaşılması vacibdir”.
“Şöbə müdiri qeyd edib ki, yer təki istifadəçilərində hasilat zamanı faydalı qazıntıların normadan artıq itkisinə yol verilməməsi, mineral-xammal ehtiyatlarından ekoloji cəhətdən təhlükəsiz şəkildə istifadə edilməsi, ətraf mühitə atılan tullantıların minimuma endirilməsi və bu kimi istiqamətlərdə ekoloji məsuliyyət olmalıdır.
“Mədənçıxarma müəssisələrinin uğurlu inkişafı hazırda sosial və ekoloji məsuliyyət sistemlərinin tətbiqi olmadan mümkün deyil”.
A.Seyidovanın sözlərinə görə, bunun üçün ilk növbədə müvafiq bərpa proqramlarının hazırlanması, ekoloji və sosial yönümlü tədbirlərin planlaşdırması zəruridir və bunların hamısı mədən istismara verilməzdən əvvəl olmalıdır.
“Eyni zamanda yeni texnologiyaların istifadəsinin təşviq edilməsi bu sahədə tullantıların və ətraf mühitin çirklənməsinin minimum həddə çatdırılmasında əsas rol oynayacaq”.
