Rabatda “Qarabağ xanlığı: tarixi və mədəni kimlik” albom-kitabının təqdimat mərasimi keçirilmişdir - FOTO
Mərakeşin paytaxtı Rabatda 8 noyabr Zəfər günü münasibətilə “Qarabağ xanlığı: tarixi və mədəni kimlik” albom-kitabının təqdimat mərasimi keçirilmişdir
2023-cü il noyabrın 8-də Mərakeşin paytaxtı Rabat şəhərində yerləşən Mərakeş Milli Kitabxanasında Azərbaycan Respublikasının Mərakeşdəki Səfirliyinin təşkilatçılığı ilə Zəfər günü münasibətilə “Qarabağ xanlığı: tarixi və mədəni kimlik” adlı albom-kitabın təqdimatı mərasimi keçirilmişdir. Sözügedən albom-kitab ingilis, fransız və ərəb dillərində XIX əsrin 70-ci illərindən başlayaraq 1912-ci ilə qədər davam etmiş dövr ərzində Tiflisdəki Qafqaz muzeyi əməkdaşlarının tarixi Qarabağ xanlığı ərazisinə təşkil etdikləri ekspedisiyalar zamanı toplanmış dəyərli artefaktlar kolleksiyasını özündə əks etdirir. Təqdimat mərasimində eyni zamanda bu artefaktların sərgisi də qonaqlara nümayiş etdiirlmişdir. Tədbirə Mərakeş dövlət rəsmiləri, diplomatik korpusun təmsilçiləri, media, qeyri-hökumət təşkilatları nümayəndələri, eləcə də Azərbaycan diaspor təmsilçiləri olmaqla 100-ə yaxın iştirakçı qatılmışdır.
İlk olaraq, çıxış etmiş Mərakeş Milli Kitabxanasının direktoru Mohammed Ferran sözügedən təqdimatın iki ölkə arasında əlaqələrin mədəni ölçüsünün inkişaf etdirilməsində vacib rol oynadığına istinad etmiş, insanlararası əlaqələrə töhfə verməklə Mərakeş ictimaiyyətində Azərbaycanın zəngin tarixi, mədəniyyəti və dəyərləri haqqında daha geniş təsəvvürün formalaşması və məlumatlılığın artmasına xidmət edəcəyini vurğulamışdır.
Azərbaycanın Mərakeşdəki Səfiri Nazim Səmədov Azərbaycan xalqının ümummilli lideri Heydər Əliyevin anadan olmasının 100 illik yubileyi çərçivəsində təşkil edilən bu təqdimat mərasiminin Azərbaycanın mədəniyyət paytaxtı olan və 28 illik işğaldan azad olduqdan sonra bu statusu özünə qaytaran ən mühüm regionlarımızdan biri- Qarabağ haqda unikal tədqiqatların yekun məhsulu olan bir kitaba həsr edildiyini bildirmişdir. Səfir həmçinin, Tiflis şəhərində yaradılmış “Qafqaz muzeyi” əməkdaşlarının Qafqazın müxtəlif regionlarına yerli xalqlar haqda tarixi və etnoqarfik materiallar toplamaq üçün çoxsaylı ekspedisiyalar keçirdiyini və Qarabağ xanlığı ərazisindən toplanan materialların əsasən 1912-ci il ekspedisiyaları zamanı toplandığını diqqətə çatdırmışdır. O cümlədən, Qafqaz muzeyi əsasında yaradılmış Gürcüstan Milli Muzeyinin arxivlərində saxlanılmış materiallar və artefaktların detallı analiz, kataloqlaşdırma, fotoçəkilişinin aparılması nəticəsində həmin materiallar əsasında albom tərtib edildiyi, bu albomun isə Heydər Əliyev Fondunun təşəbbüsü və Azərbaycan Xarici İşlər Nazirliyinin təşkilati dəstəyi ilə nəşr edildiyi qeyd olunmuşdur. Kitabda Gürcüstan Milli Muzeyinin arxivlərində aşkar olunaraq tədqiq olunmuş bir neçə min artefaktdan yalnız 300-ünün əks olunduğu da vurğulanmış, burada əks olunan materialların Qarabağ xanlığı əhalisinin məhz aparıcı azərbaycanlı və müsəlman kimliyinə mənsub olmasını göstərdiyinə xüsusi diqqət yönəldilmişdir. Səfir Nazim Səmədov həmçinin, albom-kitabın təqdimatının məhz noyabrın 8-də, Qarabağda yerləşən mədəniyyət paytaxtımız Şuşa şəhərinin azad edilməsi və Zəfər Günündə təşkil edilməsinin də təsadüfi olmadığını əlavə etmişdir. Sonda Səfir tədbirdə iştirak edən Azərbaycan diaspor nümayəndələrini Zəfər günü və 9 noyabr Bayraq günü münasibətilə təbrik etmişdir.
Qeyd etmək lazımdır ki, artefaktların sərgisi Milli Kitabxanada növbəti iki həftə müddətində nümayiş etdiriləcəkdir. Bununla yanaşı, albom-kitab Milli Kitabxananın zəngin kitab kataloquna daxil edilmişdir ki, bu da Mərakeş oxucularına ölkəmizin Qarabağ bölgəsinin zəngin mədəniyyəti və tarixi ilə daha yaxından tanış olmaq imkanı yaradacaqdır. Təqdimat mərasiminin sonunda iştirakçılara “Qarabağ xanlığı: tarixi və mədəni kimlik” albom-kitabı hədiyyə edilmişdir.
