Tərtərdə günəbaxan tumlarının emalı müəssisəsində yoxlama aparılıb
Qida Təhlükəsizliyi Agentliyi istehlakçı hüquqlarının qorunması, həmçinin qida təhlükəsizliyinin təmin edilməsi istiqamətində tədbirləri davam etdirir.
Agentliyin İnformasiya təminatı və innovativ həllər şöbəsindən 1news.az-a verilən məlumata görə, aparılan nəzarət tədbirləri çərçivəsində Tərtər rayonunun Düyərli kəndində fiziki şəxs Muradov Taleh Mətləb oğluna məxsus günəbaxan tumlarının emalı müəssisəsində yoxlama aparılıb.
Baxış zamanı müəssisədə qida məhsulları üzrə gigiyena qaydalarına, qida təhlükəsizliyi tələblərinə əməl edilmədiyi, həmçinin müəssisənin sanitar-texniki və sanitar-gigiyenik vəziyyətin qüvvədə olan normativlərə cavab vermədiyi məlum olub.
Müəssisədə çarpaz çirklənmənin qarşısının alınması məqsədilə texnoloji prosesin ardıcıllığına əməl edilmədiyi, məhsulun istehsalı, yuyulması, qurudulması və bişirilməsi proseslərinin eyni sahədə həyata keçirildiyi, temperaturun monitorinqi və qeydiyyatının aparılmadığı, mexaniki havalandırma sisteminin qurulmadığı, müvafiq təmizlik işlərinin görülmədiyi və digər nöqsanlar aşkarlanıb. Həmçinin istehsal edilən məhsulun etiketində qida və enerji dəyərinə dair məlumatların normativ sənəddə qeyd edilən göstəricilərlə uyğunsuz olduğu aşkarlanıb.
Faktla bağlı qanunvericiliyə uyğun olaraq sahibkar barəsində inzibati protokol tərtib edilib, aşkar olunmuş nöqsanlar aradan qaldırılanadək emal müəssisəsinin fəaliyyəti məhdudlaşdırılıb və icrası məcburi göstərişlər verilib.
