Deputat: “Növbədənkənar Prezident seçkiləri ilə bağlı qərarın verilməsi yerində atılmış bir addımdır”
“Regionda, dünyada fərqli proseslər baş verir, bu dəyişikliklər fonunda çevik və vaxtında addımlar atılmalıdır”.
Bu sözləri 1news.az-a açıqlamasında Milli Məclisin deputatı Naqif Həmzəyev fevralın 7-də Azərbaycanda keçiriləcək növbədənkənar Prezident seçkiləri ilə bağlı danışan zaman deyib.
“Biz bundan əvvəl Prezident seçkilərinin növbədənkənar keçirilməsinin şahidi olmuşuq, 2018-ci ildə Prezident seçkiləri uğurla başa çatıb. Eyni zamanda 2020-ci ildə parlament seçkiləri növbədənkənar keçirilib. Bu seçkinin də növbədənkənar keçirilməsinin nə qədər düzgün qərar olduğunu gördük. Bu baxımdan da növbəti dəfə belə bir qərarın verilməsi yerində atılmış bir addımdır”.
Deputat deyib ki, onsuz da 44 günlük Vətən Müharibəsindən sonra və xüsusilə də son 3 il ərzində Qarabağ və Şərqi Zəngəzurda aparılan abadlıq və quruculuq işləri, Azərbaycanın regionda yaratdığı yeni reallıqlar fonunda Azərbaycan gücünə güc qatıb.
“ Artıq Azərbaycan hərkəs tərəfindən diqtə edən tərəf kimi qəbul edilir. Öncə keçirilən bütün Prezident seçkilərində də cənab Prezident İlham Əliyev yekdilliklə hamının səsini toplayaraq bu vəzifəni icra edibdir. Mən düşünürəm ki, xüsusilə də son illərdə əldə olunan uğurlar onunda İlham Əliyevə olan sevgi daha da artıb. Bu baxımdan da növbədənkənar seçkilərin keçirilməsi xalq tərəfindən də dəstəklənəcək. Növbədənkənar seçkilərin keçirilməsi cənab Prezident İlham Əliyevin növbəti seçkilər də qələbə qazanacağınını zəruri edir. Əminliklə deyə bilərəm ki, Azərbaycan xalqı yekdilliklə İlham Əliyevin namizədliyini dəstəkləyəcək”.
Qeyd edək ki, bu gün Prezident İlham Əliyevin sərəncamı ilə Azərbaycanda növbədənkənar Prezident seçkiləri elan edilib. Mərkəzi Seçki Komissiyası növbədənkənar Azərbaycan Respublikası Prezidenti seçkilərinin 2024-cü il fevralın 7-nə təyin olunmasını və Azərbaycan Respublikasının Seçki Məcəlləsində müəyyən edilmiş qaydada keçirilməsini təmin etməlidir.
