ASCO-nun sədri “Aframax” tipli “Şuşa” gəmisinin komandir heyətinə tapşırıqlar verib - FOTO
“Azərbaycan Xəzər Dəniz Gəmiçiliyi” QSC-nin (ASCO) İdarə Heyətinin sədri Rauf Vəliyev Türkiyənin İzmir şəhərindəki Aliağa limanında Azərbaycan bayrağı altında beynəlxalq sularda üzən “Aframax” tipli “Şuşa” gəmisini ziyarət edib.
Bu barədə 1news.az-a ASCO-dan məlumat verilib.
Sədr əvvəlcə gəmi heyətinin iş şəraiti ilə yaxından tanış olub, onların problemləri ilə maraqlanıb, təklif və istəklərini dinləyib.
R.Vəliyev daha sonra komandir heyəti ilə görüşərək gəminin istismarına və idarə edilməsinə dair fikir mübadiləsi aparıb. Gəmi kapitanına beynəlxalq standartlara uyğun yükdaşıma fəaliyyəti ilə bağlı bir sıra tapşırıqlarını verib, liman nəzarət müfəttişləri tərəfindən aparılan yoxlamalar zamanı qanunvericiliyin tələblərinə əməl etməyin vacibliyini diqqətə çatdırıb. Həmçinin sağlamlıq, əməyin mühafizəsi, təhlükəsizlik, nizam-intizam kimi məsələlərə toxunub və bu istiqamətdə dənizçilərin məsuliyyət və öhdəliklərindən danışıb.
"Aframax” tipli “Şuşa” gəmisi 15 iyun 2023-cü ildə, Milli Qurtuluş Günündə ölkəmizin hüdudlarından xeyli uzaqda – Sinqapurda istismara qəbul edilib və gəmidə üçrəngli bayrağımız qaldırılıb. Digər “Aframax” tipli tankerlər kimi, “Şuşa” gəmisinin də dedveyti (yəni, ümumi yükgötürmə qabiliyyəti) təxminən 115 000 tondur.
