Xankəndidə bayrağımızın dalğalanması “Heydər Əliyev İli”nə ən böyük töhfədir
Azərbaycan Respublikasının Prezidenti cənab İlham Əliyevin müvafiq Sərəncamı ilə 2023-cü il ölkəmizdə “Heydər Əliyev İli” elan olunub.
Müstəqil Azərbaycan dövlətinin banisi Heydər Əliyevin 100 illik yubileyi ölkəmizdə milli bayram səviyyəsində qeyd edilir. Çünki həm sovetlər, həm də müstəqillik dövründə ümummilli liderin çoxşaxəli fəaliyyəti yalnız Azərbaycan xalqının tərəqqisinə və inkişafına xidmət edib.
Ömrünü xalqının gələcəyinə, Azərbaycanın müstəqilliyinə həsr edən Heydər Əliyev ərazi bütövlüyü məsələsini daim diqqətdə saxlayıb, torpaqlarımızı qəsb etmək istəyən düşmənlərə qarşı əzm və qətiyyətlə mübarizə aparıb. O, respublikaya rəhbərlik etdiyi dövrdə əsl dövlət xadimi kimi respublikanın bütün regionlarının inkişafına xüsusi diqqət yetirib və öz vətəndaşlarını etnik mənsubiyyətinə görə bir-birindən ayırmayıb.
Ermənistan rəhbərliyi tərəfindən sovet dönəmində, Azərbaycanın ayrılmaz tərkib hissəsi olan Dağlıq Qarabağ Muxtar Vilayətinin Ermənistan Respublikasına birləşdirilməsinə vaxtaşırı cəhdlər edilib, lakin ümummilli lider Heydər Əliyevin güclü iradəsi sayəsində bu cəhdlərin qarşısı vaxtında alınıb. Ulu öndərin bu barədə söylədiyi dəyərli fikirlərə nəzər salaq: “Məni düzgün başa düşün, olan şeyi deyirəm. Mən o vaxt bunların qarşısını aldım. Amma, qarşısını almaq da çətin idi. İradəmlə və Azərbaycan xalqının milli mənafelərini canımla, qanımla müdafiə edərək qarşısını aldım”.
Ulu öndər Heydər Əliyev son dərəcə təcrübəli dövlət başçısı və böyük siyasi xadim kimi hər zaman çətin və mürəkkəb vəzifələrin öhdəsindən müvəffəqiyyətlə gəlmək bacarığı nümayiş etdirib və Azərbaycan dövlətinin milli maraqlarını daim qətiyyətlə qoruyub.
Xüsusi olaraq qeyd etmək lazımdır ki, Qarabağın mərkəzi Xankəndi şəhərinin də nəzarətimizə keçməsi ilə ərazi bütövlüyümüzün bərpa olunmasının “Heydər Əliyev ili”nə təsadüf etməsi Azərbaycan xalqı üçün də böyük rəmzi məna daşayır. Sözsüz ki, Prezident İlham Əliyevin rəhbərliyi ilə müzəffər Ordumuzun torpaqlarımızı işğaldan azad etməsi dövlət başçısının “Heydər Əliyev İli”nə ən böyük töhfəsidir. Çünki vaxtilə ümumilli lider Heydər Əliyev Azərbaycan xalqına müraciətində “Mənim başa çatdıra bilmədiyim bütün işləri İlham Əliyev başa çatdıracaq” deyərək İlham Əliyevi siyasi varis elan etmişdi.
Ali Baş Komandan İlham Əliyevin 44 günlük Vətən Müharibəsində tarixi torpaqlarımızı düşmən tapdağından azad etməsi, 2020-ci il 8 noyabr tarixində Azərbaycanın Zəfər rəmzi hesab edilən Şuşa şəhərində və 2023-cü il oktyabrın 15-də Xankəndi şəhərində Azərbaycan Respublikasının dövlət bayrağının ucaldması Heydər Əliyevin necə uzaqgörən bir siyasətçi olduğunu bir daha sübut etdi.
“Heydər Əliyev İli”ndə cənab Prezident İlham Əliyev tərəfindən Xankəndi şəhərinin mərkəzi meydanında dövlət bayrağımızın ucaldılması xalqımız üçün böyük tarixi əhəmiyyət kəsb edir. Çünki Qarabağı, Şuşanı azad görmək ümummilli lider Heydər Əliyevin ən böyük arzusu idi. Ali Baş Komandan İlham Əliyev Şuşanın azad edilməsi ilə ata vəsiyyətini yerinə yetirdi.
Azərbaycan xalqı ümummilli lider Heydər Əliyevin ideyalarını uğurla həyata keçirən Azərbaycan Respublikasının Prezidenti İlham Əliyevi ölkəmizdəki ictimai-siyasi sabitliyin, əmin-amanlığın və sülhün qarantı hesab edir, ona tam güvənir. Biz bu gün Azərbaycan xalqı olaraq ulu öndər Heydər Əliyevin əziz xatirəsini dərin hörmət və ehtiramla yad edir və anırıq.
Süleyman İbrahimov
