“PAŞA Holding”in “Vətən əmanətlərin keşiyindədir” layihəsi çərçivəsində şəhid ailələrinə bayram sovqatları çatdırılır - FOTO
"PAŞA Holding" 44 günlük Vətən Müharibəsində şəhid olan qəhrəmanlarımızın 18 yaşadək olan övladları üçün sosial dəstək proqramını davam etdirir.
Proqram çərçivəsində, Yeni il, Novruz Bayramı, Qurban Bayramı, Ramazan Bayramı və Zəfər günü münasibətilə şəhid övladı olan ailələrə PAŞA Holding və Bravo supermarketlər şəbəkəsi tərəfindən bayram sovqatlarının təqdim edilməsi nəzərdə tutulub.
Yeni il münasibəti ilə təqdim edilən sovqatlar 15 dekabr tarixindən etibarən Bravo supermarketlər şəbəkəsi tərəfindən “Regional İnkişaf” İctimai Birliyinin könüllülərinin dəstəyi ilə sözügedən şəhid ailələrinə çatdırılmaqdadır. Bayram sovqatlarına müxtəlif ərzaq məhsulları daxildir. Sosial proqram məhz 18 yaşadək uşaqları əhatə etdiyindən, sovqat qutusuna uşaqlar üçün də bayram paketi daxil edilib. Layihə 44 günlük Vətən Müharibəsində, zəfərdən sonra və sentyabr təxribatları zamanı şəhid olan şəxslərin ümüumilikdə 800-dən çox ailəsini əhatə edir.
Xatırladaq ki, PAŞA Holding və onun törəmə şirkətləri tərəfindən 44 günlük Vətən Müharibəsində şəhid olan qəhrəmanlarımızın 18 yaşadək olan övladları üçün təşkil olunmuş bu proqrama həm təhsil, həm də səhiyyə sahələri daxildir.
Məlumat üçün qeyd edək ki, PAŞA Holding cari təşəbbüsü növbəti il – yəni 2024-cü il ərzində də davam etdirəcək. Təşəbbüs çərçivəsində şəhid övladlarına eyni qaydada sovqatların, məktəbli ləvazimatlarının təqdim edilməsi, eləcə də sığorta xidmətlərinin təmin edilməsi nəzərdə tutulur.
