Xaçmazın İstisu kəndində məktəb bərbad vəziyyətdədir - Problem nə zaman həll olacaq? - Açıqlama
Xaçmaz rayonu, İstisu kənd sakini Səbinə Rüstəmova 1news.az-ın redaksiyasına müraciət edərək kənd məktəbində acınacaqlı vəziyyətindən danışaraq, bunu sübut edən videogörüntü əlavə edib.
O qeyd edib ki, yağış qar suları damdan birbaşa sinifə axır.
“Xaçmaz rayon İstisu məktəbinin 100-ə yaxın yaşı var və əsaslı təmir olunmalıdır. Məktəbin ətrafında nəhəng siçovullar da qaçır. Uşaqlar bu vəziyyətdə təhsillərini davam etdirirlər. Üstəlik, uzun illərdir ki, məktəbdə ingilis dili və fizika müəllimləri yoxdur, uşaqlar bütün bu müddət ərzində bu fənlərdən bilik almayıblar”, - deyə oxucu yazır.
Məsələ ilə bağlı Quba-Xaçmaz Regional Təhsil İdarəsindən 1news.az-ın sorğusuna cavab olaraq bildiriblər ki, həmin məktəbin mövcud durumu barədə məlumatlıdırlar.
“Əməkdaşlarımız bir neçə dəfə məktəbdə olaraq , məktəbin təmir-tikinti ehtiyaclarını müəyyən ediblər. Hazırki problemin aradan qaldırılması cari təmir ilə mümkün hesab edilmir, əsaslı təmirə ehtiyac var. Əsaslı təmir ehtiyacı barədə tərəfimizdən Elm və Təhsil Nazirliyinin Əsaslı Tikinti və Təchizat İdarəsinə məlumat təqdim olunub”.
