Azərbaycan və IFC COP29 üzrə əməkdaşlığın genişləndirilməsini müzakirə edib - YENİLƏNİB
İqtisadiyyat naziri Mikayıl Cabbarov Beynəlxalq Maliyyə Korporasiyasının (BMK) iqlim biznesi üzrə qlobal direktoru, COP üzrə tapşırıqlar qrupunun rəhbəri Cemi Fergüssonla görüşüb.
Nazirlikdən 1news.az-a verilən məlumata görə, BMK ilə müxtəlif istiqamətlər üzrə əlaqələrin önəmini vurğulayan iqtisadiyyat naziri qurum tərəfindən ölkəmizdə kiçik və orta biznesin inkişafı, dövlət-özəl sektor tərəfdaşlığı və digər sahələr üzrə əməkdaşlığın əhəmiyyətini qeyd edib. Bildirilib ki, Korporasiya ilə enerji səmərəliliyinin artırılması, “yaşıl” enerji zonalarının yaradılması, tullantıların emalı kimi istiqamətlərdə layihələrin icrası Azərbaycanın strateji inkişaf hədəfləri ilə yanaşı, regional inkişafa töhfə verə bilər.
Cemi Fergüsson IFC adından Azərbaycanı COP29-a ev sahibliyi münasibətlə təbrik edib, təmsil etdiyi qurumun daim dəstək verməyə hazır olduğunu vurğulayıb, ölkəmizdə milli inkişaf hədəflərinə nail olmaq məqsədilə həyata keçirilən sosial-iqtisadi islahatları müsbət dəyərləndirib.
Tərəflər bu il Azərbaycanda keçiriləcək COP-29, “yaşıl” keçid, enerji təhlükəsizliyi, dövlət-özəl tərəfdaşlığı üzrə əməkdaşlığın inkişafı məsələlərini nəzərdən keçiriblər.
***
14:08
Azərbaycan və Beynəlxalq Maliyyə Korporasiyası (IFC) arasında COP29 üzrə əməkdaşlığın genişləndirilməsi müzakirə edilib.
1news.az xəbər verir ki, bunu iqtisadiyyat naziri Mikayıl Cabbarov "X" sosial şəbəkəsindəki hesabında bildirib.
Onun sözlərinə görə, müzakirələr Korporasiyanın iqlim biznesi üzrə qlobal direktoru, COP üzrə tapşırıqlar qrupunun rəhbəri Cemi Fergüsson ilə görüşdə baş tutub.
Tərəflər "yaşıl enerji"yə keçid və enerji təhlükəsizliyinin dəstəklənməsi, IFC ilə COP29 üzrə əməkdaşlıq istiqamətlərinin genişləndirilməsi, dövlət-özəl tərəfdaşlığının təşviqi məsələlərini müzakirə edib.
