2024-cü ilin yanvar ayında iqtisadiyyatın bir sıra sahələrində yüksək artım templəri müşahidə olunub

2024-cü il Azərbaycan iqtisadiyyatında yüksək göstəricilərlə başlayıb.

İqtisadiyyat Nazirliyindən 1news.az-a verilən məlumata görə, ötən ilin müvafiq dövrü ilə müqayisədə bu ilin yanvar ayında ÜDM 5%, o cümlədən qeyri-neft-qaz ÜDM-i 12,3% artıb.

Əlavə dəyərdə artım tikinti sektorunda 66,9%, nəqliyyat və anbar təsərrüfatında 26,8%, qeyri-neft-qaz emal sənayesində 16,8%, turizm və ictimai iaşədə 12,1%, informasiya və rabitədə 11,8% təşkil edib. Ölkə iqtisadiyyatında yüksək investisiya fəallığı qeydə alınıb.

2024-cü ilin yanvar ayında ötən ilin müvafiq dövrü ilə müqayisədə əsas kapitala investisiya qoyuluşları 37,4%, o cümlədən qeyri-neft-qaz sektoruna 34,1% artıb ki, bu da iqtisadi artıma töhfə verən mühüm amildir.