Azərbaycan ABŞ şirkəti ilə dekarbonizasiyanın modelləşdirilməsini müzakirə edib
Avropa Yenidənqurma və İnkişaf Bankının (EBRD) Yaşıl İqtisadiyyat və İqlim Fəaliyyəti Departamentinin Əməliyyat Lideri ilə layihənin icraçısı qismində cəlb edilmiş ABŞ-ın “Tetra Tech” beynəlxalq məsləhətçi şirkətinin nümayəndələri tərəfindən Azərbaycanın 2050-ci ilə qədər istilik effekti yaradan qazların emissiyalarının azaldılması yollarının modelləşdirilməsi haqqında müzakirələr aparılıb.
1news.az-ın Energetika Nazirliyinə istinadən verdiyi məlumata görə, bu müzakirələr Azərbaycanda səfərdə olan “Tetra Tech” şirkətinin nümayəndələri ilə “Energetika Nazirliyi və Avropa Yenidənqurma və İnkişaf Bankı arasında Azərbaycanın elektroenergetika sektorunun inkişafı ilə bağlı texniki dəstəyə dair Anlaşma Memorandumu” çərçivəsində “Azərbaycanın elektroenergetika sektorunda aşağı karbonlu həll yolları” texniki yardım layihəsinin müzakirəsi məqsədilə keçirilən görüşdə aparılıb.
Bildirilib ki, bu şirkət tərəfindən elektroenergetika sektorunun dekarbonizasiyası siyasətinə dəstək verəcək PLEXOS və TIMES modellərinə dair təqdimat nümayiş olunub. Həmçinin layihə üzrə icra ediləcək tapşırıqlar nəzərdən keçirilib və layihənin mühüm strateji elementləri müzakirə edilib.
Görüşdə Energetika, İqtisadiyyat, Ekologiya və Təbii Sərvətlər nazirliklərinin, “Azərenerji” ASC-nin və Enerji Məsələlərini Tənzimləmə Agentliyinin nümayəndələri iştirak edib.
Qeyd edək ki, layihənin texniki tapşırığı özündə mövcud modellərin hesablanmasını, Azərbaycanın 2050-ci ilə qədər istilik effekti yaradan qazların (İEYQ) emissiyalarının azaldılması yollarının modelləşdirilməsini, Azərbaycanda enerji sektorunun dekarbonizasiyası üçün müvafiq siyasət və texnologiyalarla bağlı tövsiyələrdən ibarət yol xəritəsinin hazırlanmasını, habelə bu sahədə potensialın gücləndirilməsi və maraqlı tərəflərin cəlb edilməsini ehtiva edir.
