Elman Nəsirov: Avropa parlamentarilərin ermənipərəst mövqeləri korrupsiya ilə bağlıdır
“Azərbaycan torpaqlarının 30 il işğal altında qaldığı dövrdə ölkəmizə qarşı müxtəlif istiqamətlərdən təzyiq və təhdidlər olub”.
Bunu 1news.az-a açıqlamasında Milli Məclisin deputatı Elman Nəsirov deyib.
O, bildirib ki, bu gün ərazi bütövlüyümüz və suverenliyimiz tam şəkildə təmin edildikdən sonra, həmin təzyiqlər daha aqressiv xarakter almış və müxtəlif istiqamətlərdə koordinasiya olunmuş hərəkətlər müşahidə edilməkdədir.
“Avropalı parlamentarilər bəzən o qədər absurd və gülünc bəyanatlarla çıxış edirlər ki, bu tənqidə belə dözmürlər. İlk təəssürat odur ki, onlar milli kimliklərini unudaraq erməni maraqlarına xidmət etməkdədirlər. Parlamentarilərin ermənipərəst mövqeləri korrupsiya ilə bağlıdır və bu, reallıqdır. Avropa Parlamentinin Azərbaycan əleyhinə son müzakirələrinə başqa bir ad vermək mümkün deyil. Onlar iki istiqamətdə Azərbaycan əleyhinə qətnamə layihəsini müzakirə edirlər və bir daha öz ermənipərəst mövqelərini nümayiş etdirirlər.
Birinci istiqamət Azərbaycanla bağlı guya insan hüquq və azadlıqlarının pozulması iddialarına əsaslanır. Bu iddiaları şişirdərək elə təqdim edirlər ki, sanki öz ölkələrində bütün problemlər həll olunub. Halbuki insan hüquqları və beynəlxalq hüququn pozulmasında ittiham olunan elə həmin Avropa dövlətləridir. Bu iddialar ikili standartların və riyakarlığın ən açıq nümunəsidir.
İkinci məsələ isə Ermənistan-Azərbaycan sülh prosesi ilə bağlıdır. Avropa Parlamenti sülh prosesində Azərbaycanı ittiham tərəfi kimi seçib
E. Nəsirov bildirib ki, Şmit, Avropa Parlamentində dinləmələr zamanı Azərbaycanın üzərinə məsuliyyət qoyaraq, Ermənistanın guya sülh istəyən tərəf olduğunu iddia edir.
“Azərbaycan sülhdən yayınmır, lakin biz hərtərəfli və ədalətli bir sülh istəyirik.Daha da irəli gedən Fransua Bellami, Azərbaycanın guya zorakılıq törətməkdə ittiham edir və açıq şəkildə erməni maraqlarına xidmət etdiyini göstərir. Bellami Ermənistanın Cənubi Qafqazda və dünyada azadlıq və təhlükəsizlik uğrunda mübarizə apardığını iddia edir ki, bu da Nəsirov tərəfindən ciddi şəkildə tənqid olunur. Deputat Bellamini və digər oxşar çıxışlar edən parlamentariləri siyasi həyasızlıqda ittiham edir və onların əsassız iddialarının reallıqla heç bir əlaqəsinin olmadığını vurğulayır.
Elman Nəsirov həmçinin Avropalı parlamentarilərin Azərbaycana qarşı təzyiq və təhdid dili ilə danışmaq cəhdlərinin uğursuzluğa məhkum olduğunu bildirir. Azərbaycan ərazi bütövlüyünü güc yolu ilə bərpa edib və bundan sonra da sülh prosesinə sadiq qalaraq Ermənistanla tam və ədalətli bir sülh müqaviləsi imzalamaq niyyətindədir.
O vurğulayıb ki, Prezident İlham Əliyevin dediyi kimi, sülh müqaviləsinin hər bir bəndi bizim üçün eyni dərəcədə vacibdir və avropalı parlamentarilər anlamalıdırlar ki, heç kim Azərbaycanla təzyiq və təhdid dili ilə danışa bilməz.
Deputat son olaraq bildirib ki, Avropa Parlamentində Azərbaycanın enerji kontraktlarına yenidən baxılması təkliflərini irəli sürənlər öz ağıllarını itiriblər və siyasi dəli səviyyəsinə eniblər.
