Səfir: Azərbaycandan 40 müşahidəçi Qazaxıstandakı seçkiləri izləyəcək
Qazaxıstanda iyunun 9-da keçiriləcək növbədənkənar prezident seçkiləri ilə bağlı namizədlərin qeydə alınması prosesi başa çatıb. Dörd partiya seçkilərdə iştirak edəcək.
1news.az xəbər verir ki, bu barədə Qazaxıstanda prezident seçkiləri ilə əlaqədar bu ölkənin Azərbaycandakı səfiri Beybit İsabayev keçirdiyi brifinqdə deyib.
O bildirib ki, bu ilin martında Qazaxıstanda hakimiyyətin sülh yolu ilə ötürülməsi baş verdi. Bu proses konstitusiyaya tam uyğun şəkildə həyata keçirildi.
Diplomatın sözlərinə görə, Qazaxıstanın Mərkəzi Seçki Komissiyası tərəfindən hazırda prezident vəzifəsini icra edən Kasım-Jomart Tokayev daxil olmaqla 7 namizədi qeydə alıb.
Onun sözlərinə görə, seçkiləri müşahidə etmək üçün hazırda 125 xarici müşahidəçi qeydiyyatdan keçib. Ümumilikdə 10 beynəlxalq təşkilatdan min müşahidəçinin seçkiləri izləməsi gözlənilir:
"Azərbaycandan da nümayəndə heyəti dəvət olunub. Həm MSK-a, həm də Milli Məclis, eləcə də beynəlxalq təşkilatlar çərçivəsində Azərbaycandan 40 müşahidəçi gözləyirik".
Səfir əlavə edib ki, Qazaxıstanın Azərbaycandakı səfiliyində vətəndaşların səs verməsi üçün 262 saylı səsvermə məntəqəsi açılacaq.
"Qazaxıstanla Azərbaycan arasındakı yüksək səviyyəli qardaşlıq münasibətləri ölkənin yeni rəhbərliyi dövründə də dinamik inkişafını davam etdirəcək", deyə İsabayev vurğulayıb.
Xatırladaq ki, Qazaxıstanın sabiq prezidenti Nursultan Nazarbayev prezident seçkilərindəki "Nur Otan" Partiyasından Tokayevin namizədliyini irəli sürüb.
Pərvanə Sultanova