Elmar Məmmədyarov İndoneziya səfiri ilə terrorla mübarizənin vacibliyindən danışıblar

Xarici işlər naziri Elmar Məmmədyarov İndoneziya Respublikasının Azərbaycandakı fövqəladə və səlahiyyətli səfiri Raden Prayono Atiyantonu diplomatik fəaliyyətinin başa çatması münasibətilə qəbul edib

Xarici İşlər Nazirliyinin mətbuat xidmətindən verilən məlumata görə, görüşdə nazir Elmar Məmmədyarov Cakarta şəhərində törədilmiş silsilə terror aktları nəticəsində çoxsaylı insan tələfatı ilə bağlı Azərbaycan Respublikasının Prezidenti cənab İlham Əliyev tərəfindən İndoneziya Respublikasının Prezidenti cənab Joko Vidodoya başsağlığı məktublarının ünvanlandığını diqqətə çatdırdı.

Məmmədyarov bəyan edib ki, terrorizmdən əziyyət çəkən dövlət kimi Azərbaycan terrorizmin bütün forma və təzahürlərini kəskin şəkildə qınayır.

Səfir başsağlığı məktublarına, terror aktları nəticəsində insan itkisi ilə əlaqədar İndoneziyanın kədərinə şərik çıxmasına və göstərilən dəstəyə görə təşəkkürünü bildirərək, bunun Azərbaycan və İndoneziyanın terrora qarşı birliyinin nümunəsi olduğunu qeyd etdi.

Eyni zamanda, nazir Elmar Məmmədyarov İslam dünyasında həmrəyliyin vacibliyini xüsusilə qeyd edib.

Görüşdə Azərbaycan və İndoneziya arasında siyasi, iqtisadi, enerji və digər sahələrdə əməkdaşlığın inkişafından məmnunluq ifadə olundu. İki ölkənin xarici işlər nazirlikləri arasında siyasi məsləhətləşmələrin həyata keçirilməsinin və terrorizmə qarşı mübarizədə birgə səylərin zəruriliyi vurğulandı.

1news.az