Vyanada Azərbaycan-Avstriya ikitərəfli əlaqələri müzakirə olunub
Azərbaycanın xarici işlər nazirinin müavini Araz Əzimov Avstriyaya səfəri çərçivəsində bir sıra ikitərəfli görüşlər keçirib.
Azərbaycanın Avstriyadakı səfirliyindən bildiriblər ki, Avstriyanın Avropa, İnteqrasiya və Xarici İşlər Nazirliyinin baş katibi Mixael Linhartla görüşdə ölkələrimiz arasında əməkdaşlığın siyasi və siyasi-təhlükəsizlik aspektləri, Dağlıq Qarabağ münaqişəsi, Ukrayna və Yaxın Şərqdə vəziyyət, miqrant problemi kimi məsələlər barədə fikir mübadiləsi aparılıb. İki ölkənin ərazi, əhali və strateji vəziyyəti ilə bağlı oxşarlıqlar nəzərə alınmaqla ikitərəfli əməkdaşlığın daha da genişləndirilməsi üçün potensialın mövcudluğu vurğulanıb.
Avstriya parlamentinin birinci vitse-spikeri Karlhaynts Kopfla görüşdə parlamentlərarası əlaqələrin inkişaf etdirilməsi, dostluq qrupları arasında əməkdaşlıq mövzuları müzakirə edilib. Görüşdə parlamentlərarası dostluq qruplarının fəaliyyətinin əhəmiyyəti xüsusilə qeyd olunub.
Avstriyanın Avropa, İnteqrasiya və Xarici İşlər Nazirliyinin təhlükəsizlik siyasəti idarəsinin rəhbəri Qerhard Yandl ilə görüşdə ümumi siyasi və təhlükəsizlik siyasəti, xüsusilə bitərəflik, qoşulmamaq siyasəti ilə bağlı məsələlərdən bəhs edilib.
AZƏRTAC
