NATO-nun xüsusi nümayəndəsi: Alyans Dağlıq Qarabağda münaqişə bölgəsi ilə bağlı narahatdır

“NATO-ya üzv ölkələr Azərbaycan-Ermənistan sərhədində, eləcə də qoşunların təmas xəttində son iki ildə və ondan əvvəl də yaranmış vəziyyətlə bağlı narahatlıqlarını bildiriblər”.

1news.az-ın verdiyi xəbərə görə, bu barədə çərşənbə axşamı NATO-nun Cənubi Qafqaz və Mərkəzi Asiya üzrə xüsusi nümayəndəsi Ceyms Appaturay bəyan edib.

“NATO yaranmış vəziyyəti diqqətlə izləyir, tərəfləri aqressiyanı azaltmağa və hər iki tərəf üçün əlverişli olan sülh istiqamətində işləməyə dəvət edir”, - xüsusi nümayəndə mətbuat konfransı zamanı bildirib.

Daha sonra o, sözlərinı əlavə edib ki, Dağlıq Qarabağ münaqişəsi NATO nümayəndə heyətinin hazırkı səfərinin mövzusudur. Və bu, Azərbaycanın Prezidenti və xarici işlər naziri ilə görüşü zamanı geniş müzakirə olunacaq.

“NATO birbaşa olaraq münaqişənin həlli prosesi ilə məşğul deyil. Lakin Dağlıq Qarabaq münaqişəsi də daxil olmaqla Avropa məkanında bir çox uzanmış məsələlərin həlli ilə bağlı öz mövqeyini bildirir”, - o, bəyan edib.

Sonda o qeyd edib ki, Dağlıq Qarabağ münaqişəsi ilə bağlı NATO-nun rəsmi mövqeyi ATƏT-in Minsk qrupunun işini dəstəkləmək və münaqişənin həllində qarşılıqlı sülhə nail olmağa yönəlib.  

1news.az