Nizami Gəncəvi Beynəlxalq Mərkəzinin İdarə Heyəti Butros Butros-Qalinin vəfatı ilə bağlı açıqlama yayıb

Nizami Gəncəvi Beynəlxalq Mərkəzinin idarə heyəti BMT-nin sabiq Baş katibi, Mərkəzin fəxri üzvü Butros Butros-Qalinin vəfatı ilə əlaqədar xüsusi açıqlama yayıb.

Diasporla İş üzrə Dövlət Komitəsindən 1news.az-a verilən məlumata görə, açıqlamada NGBM təsis olunduğu gündən  Mərkəzə daim dəstək olan Butros Butros-Qalinin Nizami Gəncəvi irsinin dünyaya çatdırılmasına, həmçinin, dünyada sülhün bərqərar olunmasına mühüm töhfələr verdiyi qeyd olunub.

“Butros Butros-Qali həyatını daha ədalətli, stabil dünyanın qurulması, demokratikləşmə, qloballaşma və həmrəyliyinin gücləndirilməsi kimi idealların təbliğinə həsr etmişdi. O, dialoq və əməkdaşlığın yorulmaz vəkili, insan hüquqlarının və mədəni müxtəlifliyin müdafiəçisi idi”- deyə sənəddə vurğulanır.

Açıqlamada həmçinin bildirilir ki, Butros Butros-Qali dünyada sülhün bərqərar olmasına can atan görkəmli diplomat və intellektual idi. “O, Nizami Gəncəvi Beynəlxalq Mərkəzinin fəxri üzvü, yaxın dostu olmuş, Nizami Gəncəvi irsinin dünyaya çatdırılmasına öz böyük töhfələrini verib”.

Qeyd edək ki, Butros Butros-Qali Nizami Gəncəvi Beynəlxalq Mərkəzinin fəxri üzvü olub, təşkilatın beynəlxalq əlaqələrinin genişlənməsinə daim dəstək verib. O, 2015-ci ildə Bakıda keçirilmiş III Qlobal Foruma xüsusi videomüraciət ünvanlamışdı.

2014-cü ilin sentyabrında Butros Butros-Qali Nizami Gəncəvi Beynəlxalq Mərkəzi tərəfindən təsis edilmiş Nizami Gəncəvi mükafatı ilə təltif olunub.

1news.az