Siyavuş Novruzov: “Daxili İşlər Nazirliyini məhkəməyə verməmişəm”
“Mən Daxili İşlər Nazirliyini məhkəməyə verməmişəm”.
Bunu Milli Məclisin deputatı Siyavuş Novruzov 1news.az-a açıqlamasında deyib.
“Heç bir məhkəmədən söhbət gedə bilməz. Əksinə, mən Milli Məclisdə çıxışlarım zamanı həm karantin, həm də Vətən müharibəsi dövründə Daxili İşlər Nazirliyinin əməkdaşlarının fəaliyyətini yüksək qiymətləndirmişəm, öz minnətdarlığımı bildirmişəm. Bir daha qeyd edirəm ki, mən heç bir məhkəməyə müraciət etməyəcəm” – deputat deyib.
Qeyd edək ki, bəzi saytların yazdığı xəbərə görə, deputat Siyavuş Novruzov Daxili İşlər Nazirliyini məhkəməyə verib. O bildirib ki, Daxili İşlər Nazirliyi tərəfindən karantin qaydalarının pozulması iddiası ilə onun inzibati qaydada cəzalandırılması və cərimələnməsi tamamilə qanunsuzdur:
"Görünən odur ki, aidiyyatı qurumların və səlahiyyətli şəxslərin qanundan xəbərləri yoxdur. Halbuki, həmin qanunu biz qəbul etmişik. Orada açıq şəkildə qeyd olunur ki, bu qaydalar Milli Məclisin deputatına şamil olunmur. Yəni, hara istəyir gedə bilər. Ona görə də millət vəkili kimi həmin qanunun müvafiq madddəsi ilə deputat olaraq mənim barəmdə cərimələnmək qərarı vermək qanunsuzdur. Onu da qeyd edim ki, qanun Nazirlər Kabineti yanında Operativ Qərargahın qərarlarından üstündür. Bu səbəbdən də mən Daxili İşlər Nazirliyini məhkəməyə verirəm”.
Daxili İşlər Nazirliyinin (DİN) mətbuat xidmətinin rəhbəri Ehsan Zahidov məsələ ilə bağlı Modern.az-ın sorğusuna cavab olaraq hər bir vətəndaşın məhkəməyə müraciət etmək hüququnun olduğunu bildirib. Əlavə şərh verməyən E.Zahidov Siyavuş Novruzovun da bu ölkənin vətəndaşı olduğunu diqqətə çatdırıb: "Məhkəməyə vermək istəyir, buyursun versin”.
Xatırladaq ki, AMEA-nın prezidenti Ramiz Mehdiyevin nəvəsinin toyunda iştirak etdiyi üçün Siyavuş Novruzov DİN tərəfindən 400 manat cərimələnmişdi.
Qafar Ağayev
850