FHN işğaldan azad olunan ərazilərə icazəsiz səfər etmək istəyənlərə müraciət edib
İşğaldan azad olunan ərazilərimizə səfər etmək, həmin ərazilərdə olmaq hər birimizin arzusudur. Lakin həmin ərazilərə xüsusi icazə olmadan səfər edən mülki şəxslər mənfur düşmənlərimiz tərəfindən basdırılan minalara düşərək həlak olur və ya müxtəlif dərəcəli xəsarətlər alırlar.
1news.az-ın məlumatına görə, bunu Fövqəladə Hallar Nazirliyinin (FHN) əməkdaşı Turqay Həsənli deyib.
O bildirib ki, bu cür faciəvi halların baş verməsinin qarşısını almaq və əhalini işğaldan azad olunmuş ərazilərə qanunsuz səfərlərdən çəkindirmək məqsədilə Nazirliyin İctimai Təhlükəsizliyin Təşkili Baş İdarəsi və İctimaiyyətlə Əlaqələr İdarəsi birlikdə işğaldan azad olunmuş ərazilərə yaxın yaşayış məntəqələrində maarifləndirmə tədbirlərinə başlayıb:
"Bir neçə gündür ki, nazirliyin əməkdaşları tərəfindən Füzuli, Tərtər, Ağdam, Ağcabədi, Xocavənd və Cəbrayıl rayonlarının yaşayış məntəqələrində həyata keçirilən maarifləndirmə tədbirləri zamanı əhaliyə işğaldan azad olunmuş ərazilərdə hazırda minatəmizləmə əməliyyatlarının aparıldığı, bu ərazilərə indiki halda səfərlərin həyati təhlükə daşıdığı, eyni zamanda bu cür qanunsuz səfərlərin hüquqi məsuliyyət yaratdığı izah olunur. Ümumiyyətlə, nazirlik əhalinin təhlükəsizliyinin təmin olunması ilə bağlı mütəmadi olaraq maarifləndirici tədbirlər görür. Nazirlik əməkdaşları il ərzində bu cür maarifləndirici qabaqlayıcı tədbirlər keçirir. Əhaliyə bir daha bildiririk, minalanmış ərazilərə daxil olmasınlar, həmin ərazilərə səfər etməsinlər. Çünki bu cür proseslər həyatımız üçün təhlükəlidir".
Qafar Ağayev
