“Qazilərimizə psixoloji yardımlar artırılmalıdır” - “Çıxışa doğru”da MÜZAKİRƏ
44 günlük Vətən müharibəsi ilə bağlı psixoloji problemlər yaşayan qazilərimizin, o cümlədən doğmalarını itirmiş şəhid ailəsi üzvlərinin, erməni terrorundan fiziki və mənəvi zərər görmüş insanların psixoloji reabilitasiyasının daha səmərəli təşkili istiqamətində məqsədyönlü tədbirlər davam etdirilir.
Bunun üçün qardaş Türkiyə Respublikasından bir qrup peşəkar klinik-psixoloq və psixoterapevt ölkəmizə gəlib. Onlar yerli həkimlərlə birlikdə zərərçəkən insanlara psixoloji yardım göstərməkdə davam edirlər.
Psixoloqlar tərəfindən Vətən müharibəsi zamanı cəbhəyanı zonada, habelə erməni terrorunun hədəfi olmuş şəhər və rayonlarda əhaliyə yerində psixoloji yardımın göstəriliməsi işi də həyata keçirilir. Belə ki, onlar şəhid ailəsi üzvlərinə, yaralılara, mərmi, raket zərbəsinə hədəf olmuş evlərin sakinlərinə, müvəqqəti təxliyyə olunmuş çoxsaylı vətəndaşlara baş çəkərək onlara psixoloji və mənəvi dəstək olurlar.
1News-un məlumatına görə, AzTV-nin “Çıxışa doğru” verilişində “Qazilərimizə psixoloji yardımlar artırılmalıdır” mövzusunda aparılan müzakirələr zamanı bu barədə ətraflı danışılıb. Verilişin qonaqları – "Yaşat" fondunun rəhbəri, Qarabağ qazisi Elvin Hüseynov, Boccia idman federasiyasının baş katibi, Qarabağ qazisi İlham Məhərrəmov, Psixologiya və Konsultasiya Mərkəzinin rəhbəri, psixoloq Elnur Rüstəmov və hərbi ekspert Elxan Şıxəliyev mövzu ətrafında müzakirə aparıblar.
“Çıxışa doğru” verilişini bütöv şəkildə Azərbaycan Televiziyasının “YouTube” kanalından izləyə bilərsiniz:
