Marketdə məhsulları yararsız hala salan şəxs generalın oğlu imiş - FOTO - VİDEO - YENİLƏNİB
Marketdə məhsulları yararsız hala salan Rüstəm Orucovun generalın oğlu olduğu məlum olub.
1news.az-ın xəbərinə görə, Bakıda marketdə məhsulları yararsız hala salanlardan biri Rüstəm Orucov bir neçə il əvvəl məhkum olunub. O, Səfərbərlik və Hərbi Xidmətə Çağırış üzrə Dövlət Xidməti rəisinin sabiq müavini, general Novruzəli Orucovun oğludur.
Xatırladaq ki, R. Orucov 2017-ci il iyulun 3-də avtobus sürücüsünə qarşı xuliqanlıq etdiyi üçün həbs olunub. Binəqədi rayon Məhkəməsinin hökmü ilə 4 il 6 ay müddətinə azadlıqdan məhrum edilib.
****
10:18
Bu hadisədən sonra General-mayor Novruzəli Orucov Prezident İlham Əliyevin sərəncamı ilə Səfərbərlik və Hərbi Xidmətə Çağırış üzrə Dövlət Xidməti rəisinin həqiqi hərbi xidmətə çağırış üzrə müavini vəzifəsindən azad edilmişdi.
Marketdə özlərini çəkib yeyinti məhsullarını yararsız hala salanlar saxlanıldı.
DİN Mətbuat Xidmətinin əməkdaşı, polis leytenantı Zeyni Hüseynov 1news.az-a bildirib ki, bir neçə gün əvvvəl marketlərin birində qida məhsullarını qəsdən yararsız hala salıb və bunu mobil telefon vasitəsilə çəkib sosial şəbəkələrdə paylaşanların şəxsiyyəti müəyyən edilib.
Nəsimi Rayon Polis İdarəsinin əməkdaşları tərəfindən aparılan araşdırmalarla həmin şəxslərin Bakı şəhər sakinləri Rüstəm Orucov və Xəyalə Vəliyeva olduqlarları məlum olub. Onlar polis orqanına gətirilib və həmin şəxslərlə profilaktiki söhbətlər aparılıb, o cümlədən mağazaya dəymiş maddi ziyan ödətdirilib.
R.Orucov və X.Vəliyeva törətdikləri əməldən peşiman olduqlarını bildiriblər.
