Bilgəhdəki çimərliyə girişin bağlanmasına aydınlıq gətirildi - FOTO - VİDEO
Dünən axşam saatlarında sosial şəbəkələrində paytaxt sakinlərinin yay aylarında çimərlik kimi istifadə etdiyi Bilgəhdəki əraziyə girişin naməlum səbəblərdən bağlandığı barədə xəbər yayıldı.
Oxucularımızdan biri əraziyə girişin bağlanması anının görüntülərini çəkərək yayımladıqdan sonra sosial şəbəkələrdə həmin sahil xəttinə girişin hansı səbəbdən və kim tərəfindən bağlanması ilə bağlı geniş müzakirələr aparıldı.
Məsələyə aydınlıq gətirmək üçün Ekologiya və Təbii Sərvətlər Nazirliyinə müraciət etdik. Nazirlikdən bizə çimərliyə girişin bağlanmasından xəbərdar olmadıqlarını, dünən sözügedən ərazinin hamı üçün açıq olduğunu bildirdilər və bizə çimərliyin yerləşdiyi Sabunçu rayon İcra Hakimiyyəti ilə əlaqə saxlamağı tövsiyə etdilər.
Xatırladaq ki, bəzi ərazilərdə vaxtaşırı söküntü işlərinin aparılmasına baxmayaraq Xəzər sahillərinin hasara alınması mövzusu hələ də aktualdır. Xüsusən də yay aylarında bu, əsas müzakirə mövzularından birinə çevrilir.
Onu da xatırladaq ki, Azərbaycan qanunvericiliyinə görə sahil zolağı dövlətin müstəsna mülkiyyətidir və icra hakimiyyəti orqanlarının müvafiq icazəsi olmadan dənizə girişin bağlanması qadağandır. Bu baxımdan, sözügedən ərazinin bağlanma səbəbi bir çoxlarında sual doğurub.
Sabunçu Rayon İcra Hakimiyyətinin başçısı Adil Vəliyev məsələ ilə bağlı 1news.az-a bildirib ki, sözügedən əraziyə aparan dar girişin başlanmasına səbəb ərazidən düzgün istifadə olunmaması və antisanitariyanın hökm sürməsidir:
“Bilgəhlə Nardaranın kəsişməsində yerləşən həmin ərazi heç bir şəraiti olmayan, antisanitar vəziyyətdə idi. Bəzi insanlar oranı əxlaqsızxanaya, cəmiyyətə zidd hərəkətlər edənlərin, spirtli içki aludəçilərinin yığıncaq yerinə çevirmişdi. Axşam saat 8-dən sonra gəlib çadır quraraq səhərə kimi min cür oyundan çıxırdılar. Bir neçə konteyner qoyulmasına baxmayaraq ərazini zibilliyə çevirmişdilər”.
Həmin ərazinin çimmək üçün nəzərdə tutulmadığını deyən İcra başçısı çimərliyin bağlanmadığını, sadəcə ona aparan problemli dar girişin bağlandığını söyləyib:
“Fövqəladə Hallar Nazirliyi də buradan çimərlik kimi istifadə olunmasını qadağan edib. Həmin ərazi çimmək üçün nəzərdə tutulmadığından dəfələrlə boğulma halları qeydə alınıb. Bu yaxında isə həmin ərazidə çimən iki gənc boğularaq həyatını itirib.
Bundan əlavə ora gələn insanlar maşınları ilə əsas yolu bağlayaraq nəqliyyatın hərəkətinə mane olurdular. Öz maşınlarını dalan ərazilərdə, sakinlərin həyətlərində saxlayırdılar ki, bu da onların haqlı narazlığına səbəb olurdu. Dünən axşam isə (iyunun 15-də) yerli sakinlərlə ora gələn şəxslər arasında dava baş verib, hətta bıçaqlaşma olub. Bütün bunları nəzərə alaraq çimərliyə aparan dar girişi bağladıq. Hazırda ərazidə abadlıq işləri aparılır. Bununla belə sakinlər digər girişdən istifadə edərək çimərliyə gedə bilərlər. Bu gün mühafizə polisi ilə müqavilə bağladıq ki, həmin ərazidə post qursunlar və gələnləri yaxınlıqdakı digər girişə yönləndirsinlər.
Onu da deyim ki, həmin ərazinin yaxınlığında 31 hektarlıq hər bir şəraiti olan, Fövqəlad Hallar Nazirliyinin xilasediciləri tərəfindən nəzarət olunan çimərlik var. Arzu edənlər həmin çimərlikdən, eləcə də rayonumuzun ərazisində yerləşən digər çimərliklərdən pulsuz istifadə edə bilərlər”.
Natali Aleksandrova, Babək Cahandarov
