Diplomların tanınması zamanı müsahibədə hansı suallar verilir? - DETALLAR

Xaricdə təhsil alanların diplomlarının kvalifikasiyası (tanınması) ilə bağlı proses xaricdə təhsil alanları maraqlandıran məqamlardandır. Xüsusilə də müsahibə mərhələsi ilə bağlı çox suallar ortaya çıxır.

Bəs görəsən xarici diplomların tanınması prosesi zamanı hansı suallar verilir? Hansı ölkələrdən məzun olanlar müsahibə mərhələsinə cəlb olunur? Müsahibə mərhələsində ixtisasa aid sual verilirmi?

Məsələ ilə bağlı 1news.az-ın suallarını cavablandıran Təhsildə Keyfiyyət Təminatı Agentliyinin (TKTA) idarə heyətinin sədri Eldar Orucov bildirib ki, birmənalı olaraq, müsahibə mərhələsində heç bir şəxsin ixtisas bilikləri yoxlanılmır:

‌“Yəni, məsələn,şəxs mühəndislik ixtisası üzrə təhsil alın, həmin şəxsə mühəndislik ixtisasına uyğun sual verilmir. Suallar sadədir, məsələn təhsil aldığı dildə şəxsə “Niyə siz bu ali təhsil müəssisəsini seçmisiniz?” sualı kimi simvolik suallar verilir. Yəni, normal həyatda ünsiyyət üçün tələb olunan dil bilikləri yoxlanılır. Heç kimə akademik suallar və digər suallar verilmir”.

Pandemiya vaxtı müsahibə mərhələsinin necə həyata keçirildiyini toxunan E.Orucov bildirib ki, pandemiya vaxtı xarici diplomların kvalifikasiyaları üzrə müsahibə mərhələsi onlayn həyata keçirilib: “Müsahihələr “Zoom” proqramı vasitəsilə müsahibələr aparılır”.

E.Orucov qeyd edib ki, müsahibə mərhələsi olmadan da diplomların kvalifikasiyaları olur: “Müsahibə, əsasən, MDB və Gürcüstan universitetlərindən məzun olan şəxslərə tətbiq olunur. Avropa, Amerika Birləşmiş Ştatları və Türkiyədən məzun olan şəxslərə müsahibə tətbiq olunmur. Türkiyədə təhsil alan Azərbaycan vətəndaşına türk dilində suallar vermək absurddur”.

E.Orucovun sözlərinə görə, əvvəllər başqa dillərdə də müsahibələr olurdu, indi isə olmur.
“2018-ci ilin fevral ayından etibarən, digər dillərdə müsahibə həyata keçirilmir. Müsahibələr rus, gürcü, və Ukrayna dillərində aparılır. Digər, qırğız və özbək dilli mütəxəssislərimiz yoxdur”.

Qafar Ağayev