3 övladı Vətənə yadigar qalan şəhidin anası: “İşini və ailəsini qoyaraq döyüşə yollandı”
Sağlığında ürəklərdə taxt quran şəhid Əsgərov Rauf Vaqif oğlu 2 noyabr 1978-ci ildə Gəncə şəhərində doğulub. 44 nömrəli tam orta məktəbdə oxuyub. Ali təhsilini isə Azərbaycan Dövlət Aqrar Universitetində alıb.
1news.az xəbər verir ki, Vətən müharibəsinin qəhrəmanlarından biri olan Rauf Əsgərov sağlığında xeyirxahlığı ilə Gəncədə sevilən şəxslərdən olub.
Şəhidin anası Briliyant Əsgərova bildirib ki, oğlu Rauf öz yardımları ilə diqqət mərkəzində olub..
"Yas məclisində tanımadığı adamlar gələrək Raufun onlara etdiyi yardımlardan danışıblar. Halbuki bunlardan nə ailəsinin, nə də yaxınlarının xəbəri olub. Özünə məxsus atı belə sataraq, başqa bir şəxsin borcunu ödəyib. Vətənpərvərlik hissi Raufda hələ uşaq yaşlarından özünü göstərib.
Rauf şirkətlərdən birində rəis vəzifəsində işləyirdi, Vətən müharibəsi başlayanda işini və ailəsini qoyaraq, torpaqlarımızın işğaldan azad olunması üçün birbaşa döyüşə yollandı".
Qeyd edək ki, Füzulinin bir sıra kəndlərinin alınmasında qəhrəmanlıq göstərən baş leytenant 26 oktyabr tarixində Mərdinli kəndində şəhid olub. 3 övladı Vətənə yadigar qalıb. Azərbaycan Respublikasının Prezidenti İlham Əliyevin sərəncamları ilə ölümündən sonra "Vətən uğrunda", "Cəsur döyüşçü", "Füzulinin azad olunmasına görə" medalları ilə təltif edilib.
Aytən Sakitqızı