Osloda Anım Günü ilə bağlı foto-sərgi təşkil edilib - FOTO
Norveçin paytaxtı Osloda həftəsonu Azərbaycan məktəbi və Norveç Azərbaycanlıları Gənclər Təşkilatının (NAYO) birgə təşkilatçılığı ilə 44 günlük Vətən Müharibəsinin ildönümü ilə bağlı “Qarabağ Azərbaycandır” adlı foto-sərgi təşkil edilib.
1news.az xəbər verir ki, sərgidə istedadlı gənc fotoqraf Rüstəm Fərman İsmayılovun müəllifi olduğu Azərbaycanın mədəniyyət paytaxtı Şuşa şəhərinin bərpadan sonrakı fotoları, Zəfər Günü ilə bağlı fotolar sərgi iştirakçılarına təqdim edilib. Eyni zamanda, sərgidə işğaldan azad edilmiş ərazilərimizlə bağlı kitab sərgisi də nümayiş edilib.
Həftəsonu Azərbayan məktəbinin şagirdləri tərəfindən hazırlanmış Azərbaycan və Türkiyə bayraqları da sərgi iştirakçıları tərəfində maraqla qarşılanıb. Sərgi şagirdlərin Vətənlə bağlı söylədikləri şeirlər ətrafında davam edib.
Məktəbin fəal şagirdi Şanay Şəkari Xarıbülbül rəsmini böyük sevgi və məhəbbətlə xatirə lövhəsi üzərində çəkib. Şagird və valideynlər xatirə lövhəsində 44 günlük Vətən Müharibəsi ilə bağlı hiss və təəssüratlarını yazıblar, rəsmlər çəkiblər.
Sərgi iştirakçılarına xarıbülbül nişanı hədiyyə edilib.
1news.az