Bu ilin 9 ayında təxminən 40 min nəfər uşağın anadan olmasına görə birdəfəlik müavinət təyin edilib

2021-ci ilin ilk 9 ayında təxminən 40 min nəfərə uşağın anadan olmasına görə birdəfəlik müavinət təyin edilib. Bu il anadan olan uşaqlar üçün birdəfəlik müavinətlərin verilməsi prosesi tamamilə elektron şəkildə həyata keçirilib.

1news.az xəbər verir ki, bu barədə Dövlət Sosial Müdafiə Fondunun Sosial Sığorta və Fərdi Uçot üzrə Mərkəzi Filialının direktoru Hüseyn Paşayev feysbukda sualları cavablandırarkən bildirib.

O qeyd edib ki, elektronlaşdırma nəticəsində sığortaolunan müavinət almaq üçün heç yerə müraciət etmir və sığortaçı heç bir emal prosesi həyata keçirmir: "Mexanizmə görə, uşağın anadan olması ilə bağlı məlumatlar Azərbaycan Respublikasının Ədliyyə Nazirliyinin "Əhalinin Dövlət Reyestri" avtomatlaşdırılmış qeydiyyat informasiya sistemində əksini tapdıqdan sonra həmin məlumatlar Əmək və Əhalinin Sosial Müdafiəsi Nazirliyinin elektron informasiya sisteminə ötürülür. Sistem müavinətin büdcə vəsaiti, yoxsa məcburi dövlət sosial sığortası hesabına veriləcəyini avtomatik qaydada müəyyən edir. Aparılan elektron təyinatdan sonra müavinətin vətəndaşa ödənilməsi Əmək və Əhalinin Sosial Müdafiəsi Nazirliyi tərəfindən təmin edilir. Bu, sığorta olunan və sığorta edənləri vaxt itkisindən azad edir".

Hüseyn Paşayev, həmçinin qeyd edib ki, yaxın aylarda dəfn üçün birdəfəlik müavinətin ödənilməsinin də praktik şəkildə həyata keçirilməsi istiqamətində işlər aparılır: "Nazirliyin müvafiq şöbələri bu məsələ ilə məşğul olur. Yaxın vaxtlarda dəfn üçün ödənilən birdəfəlik müavinətlərin də təhvil verilməsi prosesinin elektronlaşdırılması mümkün olacaq".