DİN tələbə qıza əxlaqsızlıq təklif edən maklerlə bağlı hərəkətə keçdi - VİDEO
Ev axtaran tələbə qız maklerin əxlaqsız təklifinə məruz qalıb.
1news.az xəbər verir ki, tələbə qızın və maklerin səs yazısı sosial şəbəkələrdə ildırım sürətilə yayılıb. Videodan da aydın görünür ki, adını açıqlamadığımız tələbə qız kirayə qalmaq üçün Ruslan adlı maklerə zəng edərək evin qiymətini, ünvanını soruşub. Makler də evi 200 manata kirayəyə verdiyini deyib. Daha sonra əlavə edib ki, kirayədə qalan qızla intim münasibəti yaranarsa, evin qiymətində endirim də edəcək. Hətta sonrakı mərhələdə həmin qızla bir evdə yaşamasının da mümkün olduğunu açıq-aydın şəkildə dilə gətirib.
Məsələ ilə bağlı DİN Mətbuat xidmətinin şöbə rəisi, polis mayoru Elşad Hacıyevlə əlaqə saxladıq. Şöbə rəisi 1news.az-a bildirdi ki, hazırda məlum hadisə ilə bağlı araşdırma aparılır:
"Yayılan səs yazısından məlumatımız var. Hazırda bu məsələ ilə bağlı araşdırma aparılır. Araşdırma zamanı cinayət faktı aşkarlanarsa, həmin şəxs barəsində prosesual tədbirlərin görülməsi təmin ediləcək və barsəində istintaq təhqiqat aparılacaq. Onu da deyim ki, məsələ araşdırıldıqdan sonra nəticə barədə ictimaiyətə mütləq məlumat veriləcək”.
Aytən Sakitqızı