PAŞA Holding-in təşkilatçılığı ilə Korporativ İnnovasiya mövzusuna həsr olunmuş İllik İnnovasiya Sammiti baş tutub - FOTO - VİDEO
17 dekabr 2021-ci il tarixində, PAŞA Holding-in təşkilatçılığı ilə Korporativ İnnovasiya mövzusuna həsr olunmuş İllik İnnovasiya Sammiti baş tutub.
Tədbirin məqsədi ölkənin aparıcı şirkətlərini innnovasiya sahəsində müzakirələr aparmaq üçün bir araya toplamaq və onlar üçün birgə fikir və bilik mübadiləsi həyata keçirmək üçün imkan yaratmaqdır. Summit-də Google, London business school, OutThinker və digər aparıcı qlobal innovasiya ekosistemi iştirakçılarının nümayəndələri də spiker qismində çıxış edərək innovasiyanın böyük təşkilatlarda yaratdığı dəyər, eləcə də rəqabət üstünlüyü barədə bəhs ediblər.
“İnnovasiya mühitinin və ekosisteminin formalaşması və inkişaf etdirilməsi, həm böyük korporasiyalar üçün, həm də ölkənin iqtisadi inkişafı üçün mühüm rol oynayır. PAŞA Holding, regionun aparıcı korporativ oyunçularından olaraq innovasiya ekosisteminin qurulmasında öz məsuliyyətini dərk edir və bu istiqamətdə çoxsaylı addımlar atır ki, onlardan biri də elə hazırda iştirakçısı olduğumuz Summit-dir. Növbəti tədbirlərdə də çalışacağıq ki, korporativ təşkilatların maraq və tələblərinə uyğunlaşaq, onları maraqlandıran mövzuları, innovasiya sahəsində olan çətinlikləri, yeni texnoloji həll yollarını müzakirə edək və beləcə korporativ sektorun bu istiqamətdə diskussiyalar aparmaq üçün imkan yaratmış olaq” – PAŞA Holding-in İnnovasiya proqramı üzrə rəhbəri Fərrux Əliyev bildirib.
Qeyd edək ki, Summit PAŞA Bank, Kapital Bank, PAŞA Sığorta, PAŞA Həyat, Bakcell, Kaspian İnnovasiya mərkəzi və bp şirkətlərinin dəstəyi ilə həyata keçirilib.
