Türk yıldızlarının “F-16”-ları yenidən Bakı səmasında havaya qalxacaq
“TEKNOFEST Azərbaycan” festivalı Baku Cristal Hall və Dənizkənarı Milli Bulvar ərazisində keçiriləcək.
1news.az xəbər verir ki, bunu rəqəmsal inkişaf və nəqliyyat nazirliyinin müşaviri Rəşad Bayramov bildirib. O, bildirib ki, festival çərçivəsində bulvar ərazisində müxtəlif sərgilər, konsert proqramları, təyyarə, helikopter və dronların nümayiş nəzərdə tutulub:
"Festival çərçivəsində Azərbaycan Hərbi Hava Qüvvələri tərəfindən MiQ-29 qırıcıları ilə nümunəvi pilotaj uçuşları həyata keçiriləcək. Bundan əlavə, festivalda Solo Türk F16 Hərbi hava şousu, Türk Yıldızları F16 hərbi hava şousu, uçuş simulyatorları, sərgilər, hava atrakaionları və inanılmaz texniki əyləncələr, ulduzların ifasında konsert proqramı təşkil olunacaq".
Qeyd edək ki, bu ilin 26 – 29 may tarixlərində ilk dəfə olaraq Azərbaycanda Rəqəmsal İnkişaf və Nəqliyyat Nazirliyinin təşkilatçılığı ilə baş tutacaq “TEKNOFEST Azərbaycan” Aerokosmik və Texnologiya Festivalı keçiriləcək.
Xatırladaq ki, İstanbulda keçirilmiş “TEKNOFEST 2021”də Azərbaycan Pavilyonunda 11 startap nümayiş etdirilib. Startaplar kosmik sənaye, hərb, təhsil, tibb, kənd təsərrüfatı, nəqliyyat, video oyunlar kimi müxtəlif sahə və istiqamətləri, ümumilikdə yeni texnologiyaları əhatə edib.
