British Council və Böyük Britaniyanın Azərbaycandakı Səfirliyi yeddinci Britaniya Film Festivalına start verir
Birləşmiş Krallıq və Azərbaycan arasında diplomatik münasibətlərin otuzuncu ildönümü ərəfəsində British Council, Böyük Britaniya səfirliyi və Azərbaycan Respublikası Mədəniyyət Nazirliyi ilə əməkdaşlıq edərək hər il keçirilən Britaniya Film Festivalının yeddinci buraxılışına start verir.
1news.az xəbər verir ki, festival bu il filmlərin 3-15 mart 2022-ci il tarixlərində Nizami Kino Mərkəzi və YARAT Müasir İncəsənət Məkanında nümayiş etdirilməsi ilə keçiriləcək.
Biz ən həyəcanverici, düşündürücü və bəyənilən yeni filmləri Birləşmiş Krallıqdan Azərbaycana gətiririk. Britaniya Film Festivalının 2022-ci il buraxılışı qlobal iqlim təhlükəsini əməkdaşlıq, dialoq və fəaliyyət imkanları yaradaraq diqqət mərkəzinə çəkir.
Festival Oskar laureatı aktyorlar Cim Brodbent və Helen Mirrenin unudulmaz tərəfdaşlığı ilə ekranlarda iz qoyan, oğurluq və ədalət uğrunda mübarizədən bəhs edən "HERSOQ" retro-komediyası ilə açılacaq. "İNSANLAR İQLİM DƏYİŞİKLİYİNƏ QARŞI" və "SƏRHƏDLƏRİN MƏHVİ: PLANETİMİZ HAQQINDA ELM" sənədli filmləri bütün diqqətimizi iqlim təhlükəsinə və bəşəriyyətin planetimizi xilas etmək üçün nə edə biləcəyinə çəkəcək.
Azərbaycanda Britaniya Film Festivalı British Council-ın Azərbaycandakı nümayəndiliyi, Böyük Britaniyanın Azərbaycandakı Səfirliyi və Azərbaycan Respublikası Mədəniyyət Nazirliyi tərəfindən təqdim edilir.
Bütün filmlər ingilis dilində nümayiş etdiriləcək. Festivalın treylerinə buradan baxa bilərsiniz: http://bit.ly/britishfilmfestival
Biletləri Nizami Kino Mərkəzinin kassalarından və www.nizamicinema.az saytından əldə edə bilərsiniz.
Böyük Britaniyanın Azərbaycan Respublikasındakı səfiri cənab Ceyms Şarp:
“Mən ürəkdən sevinirəm ki, British Council-ın daha bir neçə mükəmməl Britaniya filmini Azərbaycana gətirməsini dəstəkləyə bilmişik. Bu il həm Birləşmiş Krallıq və Azərbaycan münasibətlərinin otuzuncu ildönümü olmasına görə, həm də keçən ilin noyabrında keçirilmiş Qlazqo İqlim Sammitinin nəticələrini tez zamanda tətbiq edə bildiyimizə görə çox vacibdir. Builki festivalın mövzusu iqlim dəyişikliyidir və biz filmlərin auditoriyanı əyləndirəcəyinə, maarifləndirəcəyinə və insanlara ilham verəcəyinə ümid edirik”.
British Council-ın Azərbaycan üzrə direktoru Frensis Qardener-Trexo:
“Yeddinci Britaniya Film Festivalı ilə Birləşmiş Krallığın ən yeni və yaxşı filmlərini Azərbaycan auditoriyasına təqdim etməkdən sevinc duyuruq. Bunu yenidən şəxsən etmək və əsl kinoteatr təcrübəsi yaşamaq üçün yenidən kinoteatrlara gələn insanları qarşılamaq daha da xoşdur. Builki mövzu iqlim dəyişikliyi ilə mübarizə baxımından çox əlamətdar vaxta təsadüf edir və film istehsalının maarifləndirmədə, müzakirələrin yaranmasında və daha yaxşı gələcək üçün qlobal həll yollarına töhfə verməkdə oynadığı rolu nümayiş etdirir”.
