“Gənc yazarlar”: Uşaqların Beynəlxalq Müdafiəsi Günü “McDonald’s Azərbaycan”ın yeni layihəsinə start verilib - FOTO
1 iyun- Uşaqların Beynəlxalq Müdafiəsi Günü münasibətilə “McDonald’s Azərbaycan” şirkəti Gəncədə xeyriyyə aksiyası keçirib. Aksiya çərçivəsində “Gənc yazarlar” adlı yeni layihəyə start verilib.
2020-ci ildə Gəncənin bombalanmasından zərər görmüş 6-15 yaşlı 50-dən çox uşaq aksiya çərçivəsində Gəncə şəhərində yerləşən “McDonald’s” restoranına dəvət olunub. Burada onlar üçün əyləncəli proqram təşkil edilib, dadlı təamlardan ibarət süfrə açılıb.
Tədbirdə əsas diqqət “McDonald’s Azərbaycan”ın CARE GROUP şirkəti ilə birgə həyata keçirdiyi “Gənc yazarlar” layihəsinə start verilməsinə ayrılıb. Tədbirə dəvət olunmuş uşaqlar sözügedən layihənin əsas iştirakçılarına çevriliblər.
CARE GROUP şirkətinin rəhbəri və baş psixoloqu Elnarə Şahbazzadənin dəstəyi ilə layihə çərçivəsində uşaqlar üçün “Art-terapiya” və “Koqnitiv davranış terapiyası” üsulları üzrə psixoloji təlimlər keçiriləcəkdir. Dünyada geniş tətbiq olunan bu üsullar qorxuya qalib gəlmək və ümumiyyətlə, psixoloji vəziyyəti yaxşılaşdırmaq baxımından özünü yaxşı tərəfdən göstərib.
Uşaqlarla 6 ay ərzində bir neçə mərhələdə iş aparılacaqdır ki, birinci mərhələ yekunlaşdıqdan sonra uşaqlara öz nağıllarını yazmaq təklif ediləcəkdir. Hər bir uşağa peşəkar psixoloq dəstəyi göstəriləcək və yazılan bütün nağıllar layihə tamamlandıqdan sonra buraxılacaq qalın üzlü kitabda nəşr olunacaq. Gənc yazarların hər birinə yazdıqları birinci kitabın nüsxəsi təqdim ediləcək, tirajın qalan kitabları isə ölkənin kitab mağazalarına paylanacaqdır. Burada arzu edən hər kəs uşaqların nağılları ilə tanış olmaq imkanı əldə edəcək, toplanan bütün vəsait isə kitabın müəlliflərinin ailələrinə kömək üçün veriləcəkdır.
Layihənin müəlliflərinin sözlərinə görə, burada əsas məqsəd uşaqlarda öz gücünə inamı tərbiyə etməkdir. Bu kontekstdə özlərinin yazdıqları nağıllar müsbət terapevtik effektə malik olacaq. Onların gözəl kitab şəklində nəşr olunması isə bu effekti daha da gücləndirəcək və gənc yazarların hər biri üçün böyük əhəmiyyətə malik olacaq.
Bayram tədbirinin sonunda layihə iştirakçılarına gənc yazar dəsti paylanılıb. Yaradıcılıq üçün zəruri ləvazimatların daxil olduğu bu dəst tədbirə daha çox müsbət emosiyalar qatıb.
“Biznesin sosial məsuliyyəti və xeyriyyəçilik fəaliyyəti hər zaman “McDonald’s” şirkətinin korporativ fəlsəfəsinin ayrılmaz tərkib hissəsi olub. “McDonald’s”ın 22 ildən çoxdur ki, Azərbaycanda həyata keçirdiyi xeyriyyəçilik fəaliyyəti çərçivəsində çoxsaylı müxtəlif səpkili layihələr reallaşdırılıb, o cümlədən uşaq evlərinə, tibbi yardım fondlarına və idman tədbirlərinə yardım göstərilib. Bütün bunlar əsasən “McDonald’s”a gələn şəxslərin ianələri və şirkətin keçirdiyi xüsusi aksiyalar sayəsində mümkün olub. İnanırıq ki, birlikdə həyati çətinliklərlə üzləşmiş uşaqlara kömək edə, onların dünyasını daha gözəl və rəngarəng edə bilərik”, - şirkət nümayəndəsi bildirib.
