Bakı metrosunda pik vaxtlarda intervalın çox olmasının səbəbi nədir? - Qurum rəsmisi AÇIQLADI
Sentyabrın 15-də yeni tədris ili başlayandan sonra Bakı metrosunda da sıxlıq müşahidə olunmağa başlayıb.
Sosial şəbəkələrdə bununla bağlı şikayətlərə rast gəlirik. Şikayətlər arasında Bakı metrosunda qatarlar arasında xüsusilə də günün pik vaxtlarında intervalın çox olması yer alır. Bəzən bu interval 8 dəqiqəyə qədər olur.
Bunu metrodan istifadə edən 1news.az-ın əməkdaşı da əyani şəkildə müşahidə edib. Son iki gündə metronun “Azadlıq” stansiyasında səhər saat 8:20-8:30 radələrində qatarların intervalı 7 dəqiqədən çox olub. Bəs bunun səbəbi nədir?
Məsələ ilə bağlı 1news.az-a danışan “Bakı Metropoliteni” QSC-nin mətbuat xidmətinin rəhbəri Bəxtiyar Məmmədov deyib ki, bu, ümumilikdə ehtiyat qatar və yaxud tənzimləməni optimallaşdırmaq üçün qrafik və sair kimi məsələlərin tərkib hissəsidir.
“Yalnız metronun “Azadlıq prospekti” stansiyasında deyil, eyni zamanda “Həzi Aslanov”, “Əhmədli” istiqamətində də olur. Saat 8-9 arası metronun ən optimal saatlardandır. Həmin vaxt qatarlardan biri ən sıx olan – “Memar Əcəmi”, “20 yanvar”, “İnşaatçılar”, “Elmlər Akademiyası” kimi stansiyalarda optimal tənzimləməni həyata keçirmək üçün qatar “Memar Əcəmi” stansiyasından geri qaytarılır. Belə olduqda təbii ki, üzü “Nəsimi”, “Azadlıq” istiqamətlərində interval artırılır. Bunu biz mövsüm başlamadan əvvəl keçirdiyimiz mətbuat konfransında da demişdik. Eyni zamanda “Neftçilər” stansiyasından sonra üzü “Xalqlar Dostluğu”, “Əhmədli”, “Həzi Aslanov” istiqamətlərində də eyni qayda ilə tənzimlənmə mexanizmi tətbiq olunur. Çünki əsas sərnişin kütləsi “Neftçilər”, “Koroğlu”, “Nərimanov” stansiyaları istiqamətində olduğu üçün gur saatlarda bir qatar qeyd etdiyim kimi verilir, “Neftçilər” stansiyasından dönüb qayıdır. Belə olduqda qismən də olsa sərnişin axınını tənzimləmək mümkün olur".
B.Məmmədov deyib ki, bu hallara 2019-cu ilə qədər bütün sərnişinlərimiz öyrənmişdi.
“Pandemiya dövründə müəyyən vərdişlər unudulub. O səbəbdən biz stansiyalara gedib sərnişinlərin şikayətlərini dinləyirik, biz sərnişinlərlə ünsiyyətdən qaçmırıq. Əminəm ki, 1 ay ərzində sərnişinlərin uyğunlaşması da olacaq. İndiki məqsədlərimizdən biri də sərnişinlərin istiqaməti rahat müəyyən etməsinə kömək etməkdir. Bu gün problemimiz odur ki, qatarların qapısı saxlanılır, belə olan halda qrafik də pozulur. Bir neçə stansiyada qapının saxlanması yetərlidir ki, metropolitendə hərəkət qrafiki pozulsun. Belə olan qatar tuneldə dayana-dayana gedir, növbəti stansiyadan qatar çıxmayana qədər həmin stansiyaya təbii ki, qatar daxil ola bilmir. Hal-hazırda bu problemlərin həlli ilə bağlı çalışırıq”.